سیدنا ابوسعید خدری رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: اس ذات کی قسم! جو شخص میرے اہل بیت سے بغض رکھے گا، اللہ تعالیٰ اسے دوزخ میں ڈالے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4768]

سیدنا انس رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: میرے رب نے مجھ سے میرے اہل بیت کے حوالے سے یہ وعدہ فرمایا ہے کہ ان میں سے جو بھی توحید کو مانتا ہو گا اور یہ اقرار کرتا ہو گا کہ میں نے رسالت کے پیغامات دنیا والوں تک پہنچا دیئے ہیں اللہ تعالیٰ اس کو عذاب نہیں دے گا۔ نوٹ: عمر بن سعید الابح بیان کرتے ہیں کہ سعید ابن ابی عروبہ کا انتقال جمعرات کے دن ہوا اور یہ حدیث انہوں نے جمعہ کے دن بیان کی تھی اس کے سات دن بعد وہ مسجد میں انتقال کر گئے۔ کچھ لوگوں نے کہا: اللہ تجھے اچھی جزاء نہ دے وہ رافضی تھا، اور کچھ لوگوں نے کہا: اللہ تعالیٰ تجھے جزائے خیر دے، تو سنی تھا اور تو نے جو سنا وہ ادا کر دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4769]

سیدنا عامر بن سعد رضی اللہ عنہ اپنے والد کا یہ بیان نقل فرماتے ہیں: جب یہ آیت نازل ہوئی نَدْعُ اَبْنَاءَنَا وَاَبْنَاءَکُمْ وَنِسَاءَنَا وَنِسَاءَکُمْ وَاَنْفُسَنَا وَاَنْفُسَکُمْ (اٰل عمران: 61) ” ہم بلائیں اپنے بیٹے اور تمہارے بیٹے اور اپنی عورتیں اور تمہاری عورتیں اور اپنی جانیں اور تمہاری جانیں “ تو رسول اللہ صلی اللہ علیہ وسلم نے سیدنا علی، سیدہ فاطمہ، سیدنا حسن اور سیدنا حسین رضی اللہ عنہم اجمعین کو بلایا اور بولے: اے اللہ یہ میرے اہل بیت ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4770]

سیدنا ابوذر رضی اللہ عنہ ایک دفعہ کعبۃ اللہ کا دروازہ پکڑ کر بولے: جو مجھے جانتا ہے وہ تو جانتا ہی ہے اور جو نہیں جانتا وہ بھی جان لے کہ میں ابوذر ہوں، میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تم میں میرے اہل بیت کی مثال وہی ہے جو نوح علیہ السلام کی قوم میں ان کی کشتی کی تھی، کہ جو اس میں سوار ہو گیا وہ بچ گیا اور جو رہ گیا وہ غرق ہو گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4771]

عامر بن سعد اپنے والد سے روایت کرتے ہیں، وہ کہتے ہیں: جب یہ آیت نازل ہوئی: ﴿ہم اپنے بیٹوں کو بلاتے ہیں اور تم اپنے بیٹوں کو﴾ تو رسول اللہ صلی اللہ علیہ وآلہ وسلم نے سیدنا علی رضی اللہ عنہ، سیدہ فاطمہ رضی اللہ عنہا، سیدنا حسن رضی اللہ عنہ اور سیدنا حسین رضی اللہ عنہ کو بلایا، پھر فرمایا: اے اللہ! یہ میرے اہلِ بیت ہیں۔ اس حدیث کی سند کی صحت پر شیخین (امام بخاری اور امام مسلم) کا اتفاق ہے اور انہوں نے اسی سند سے استدلال کیا ہے، اگرچہ اسے اپنی کتابوں میں نقل نہیں کیا، البتہ اسی سند کے ساتھ انہوں نے ابو تراب کے واقعے کو روایت کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4772]