جمیع بن عمیر سے روایت ہے، انہوں نے بیان کیا کہ میں اپنی والدہ کے ہمراہ سیدہ عائشہ رضی اللہ عنہا کی خدمت میں حاضر ہوا تو میں نے پردے کے پیچھے سے اپنی والدہ کو ان سے سیدنا علی رضی اللہ عنہ کے بارے میں سوال کرتے ہوئے سنا، تو سیدہ عائشہ رضی اللہ عنہا نے فرمایا: ”تم مجھ سے ایسے شخص کے بارے میں پوچھ رہی ہو کہ بخدا! میرے علم میں مردوں میں رسول اللہ صلی اللہ علیہ وسلم کو علی رضی اللہ عنہ سے زیادہ کوئی محبوب نہ تھا اور نہ ہی روئے زمین پر کوئی عورت آپ صلی اللہ علیہ وسلم کو ان کی زوجہ (سیدہ فاطمہ رضی اللہ عنہا) سے زیادہ محبوب تھی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4784]

ام المؤمنین سیدہ عائشہ رضی اللہ عنہا سے روایت ہے، انہوں نے فرمایا: ”میں نے گفتگو اور بات چیت کے انداز میں سیدہ فاطمہ رضی اللہ عنہا سے بڑھ کر کسی کو رسول اللہ صلی اللہ علیہ وسلم کے مشابہ نہیں دیکھا، اور جب وہ آپ صلی اللہ علیہ وسلم کے پاس تشریف لاتیں تو آپ صلی اللہ علیہ وسلم انہیں خوش آمدید کہتے، ان کے اعزاز میں کھڑے ہو جاتے، ان کا ہاتھ تھام کر اسے بوسہ دیتے اور انہیں اپنی نشست پر بٹھاتے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4785]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”فاطمہ اہل جنت کی خواتین کی سردار ہیں، سوائے مریم بنت عمران کے۔“
یہ حدیث صحیح الاسناد ہے لیکن شیخین نے اسے روایت نہیں کیا، البتہ امام مسلم نے اکیلے سیدنا ابو موسیٰ رضی اللہ عنہ سے نبی کریم صلی اللہ علیہ وسلم کی یہ حدیث روایت کی ہے کہ: «خَيْرُ نِسَاءِ الْعَالَمِينَ أَرْبَعٌ» ”عالمین کی بہترین خواتین چار ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4786]