سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”قیامت کے دن انبیاء کرام اپنی سواریوں پر اٹھائے جائیں گے تاکہ وہ اپنی قوم کے اہل ایمان کے ہمراہ میدانِ محشر میں حاضر ہوں، سیدنا صالح علیہ السلام اپنی اونٹنی پر اٹھائے جائیں گے، مجھے براق پر اٹھایا جائے گا جس کا ایک قدم وہاں پڑتا ہے جہاں اس کی نظر ختم ہوتی ہے، اور فاطمہ میرے آگے آگے سوار ہوں گی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4780]

سیدنا علی رضی اللہ عنہ سے روایت ہے کہ میں نے نبی کریم صلی اللہ علیہ وسلم کو فرماتے سنا: ”جب قیامت کا دن ہوگا تو ایک منادی (پکارنے والا) پردے کے پیچھے سے ندا دے گا: اے اہل محشر! اپنی نگاہیں نیچی کر لو یہاں تک کہ فاطمہ بنت محمد (رضی اللہ عنہا) گزر جائیں۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4781]

رسول اللہ صلی اللہ علیہ وسلم کے مولیٰ سیدنا ثوبان رضی اللہ عنہ سے روایت ہے کہ ابنہ ہبیرہ رسول اللہ صلی اللہ علیہ وسلم کے پاس آئیں جبکہ ان کے ہاتھ میں سونے کے بڑے کڑے یا انگوٹھیاں تھیں، تو رسول اللہ صلی اللہ علیہ وسلم نے ان کے ہاتھ پر مارنا شروع کر دیا، پس وہ رسول اللہ صلی اللہ علیہ وسلم کی صاحبزادی سیدہ فاطمہ رضی اللہ عنہا کے پاس گئیں اور ان سے رسول اللہ صلی اللہ علیہ وسلم کے اس طرز عمل کی شکایت کی، ثوبان رضی اللہ عنہ بیان کرتے ہیں کہ پھر رسول اللہ صلی اللہ علیہ وسلم سیدہ فاطمہ رضی اللہ عنہا کے پاس تشریف لائے اور میں بھی آپ صلی اللہ علیہ وسلم کے ہمراہ تھا، انہوں نے اپنے گلے سے سونے کی ایک زنجیر نکالی اور کہا: ”یہ مجھے ابو حسن (سیدنا علی رضی اللہ عنہ) نے تحفے میں دی ہے“، آپ صلی اللہ علیہ وسلم داخل ہوئے جبکہ وہ زنجیر ان کے ہاتھ میں تھی، تو آپ صلی اللہ علیہ وسلم نے فرمایا: ”اے فاطمہ! کیا تمہیں یہ بات خوش کرتی ہے کہ لوگ کہیں کہ محمد کی بیٹی کے ہاتھ میں آگ کی زنجیر ہے؟!“ پھر رسول اللہ صلی اللہ علیہ وسلم وہاں بیٹھے بغیر باہر تشریف لے گئے، چنانچہ سیدہ فاطمہ رضی اللہ عنہا نے فوراً اس زنجیر کے بدلے ایک غلام خریدا اور اسے آزاد کر دیا، جب یہ بات نبی کریم صلی اللہ علیہ وسلم تک پہنچی تو آپ صلی اللہ علیہ وسلم نے فرمایا: ”تمام تعریفیں اللہ ہی کے لیے ہیں جس نے فاطمہ کو آگ سے نجات عطا فرمائی۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4782]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے سیدہ فاطمہ رضی اللہ عنہا سے ارشاد فرمایا: ”بے شک اللہ تعالیٰ تمہاری ناراضگی پر ناراض ہوتا ہے اور تمہاری خوشی پر خوش ہوتا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4783]