مذکورہ سند کے ہمراہ ام المومنین سیدہ عائشہ رضی اللہ عنہا سے مروی ہے کہ سیدہ فاطمہ رضی اللہ عنہا، نبی اکرم صلی اللہ علیہ وسلم کے وصال کے بعد چھ ماہ تک زندہ رہیں۔ ٭٭ صالح بن کیسان، عقیل، ابن عیینہ، واقدی، محمد بن عبداللہ ابن اخی الزہری اور ابن جریج ان تمام نے بھی اس روایت کو اسی طرح بیان کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4818]

سیدنا عبداللہ بن عباس رضی اللہ عنہما فرماتے ہیں: سیدہ فاطمہ رضی اللہ عنہا شدید بیمار ہو گئیں تو انہوں نے سیدہ اسماء بنت عمیس رضی اللہ عنہا سے کہا: میری حالت کو تم دیکھ نہیں رہی ہو؟ کیا میں (وفات کے بعد یونہی) عیاں طور پر چارپائی پر اٹھائی جاؤں گی؟ سیدہ اسماء رضی اللہ عنہا نے کہا: خدا کی قسم! میں آپ کی میت کے لئے وہ طریقہ اختیار کروں گی جو حبشہ میں رائج ہے۔ سیدہ فاطمہ رضی اللہ عنہا نے فرمایا: مجھے اس طرح کر کے دکھاؤ۔ چنانچہ سیدہ اسماء نے کھجور کی چند تازہ ٹہنیاں منگوائیں اور چارپائی پر اس طور پر رکھ دیں کہ درمیان سے ابھری ہوئی تھیں، یہ طریقہ عرب میں سب سے پہلے اسی موقع پر اختیار کیا گیا یہ دیکھ کر سیدہ فاطمہ رضی اللہ عنہا مسکرا دیں۔ نبی اکرم صلی اللہ علیہ وسلم کی وفات کے بعد پہلی مرتبہ اس موقع پر آپ کے ہونٹوں پر میں نے تبسم دیکھا (پھر جب ان کا انتقال ہو گیا تو) ہم نے اسی طریقہ سے (وہ بھی رات کے اندھیرے میں) ان کا جنازہ اٹھایا اور ان کی تدفین کی گئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4819]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم کی صاحبزادی سیدہ فاطمہ رضی اللہ عنہا (پردہ داری کا یہ عالم تھا کہ ان) کو رات کی تاریکی میں دفن کیا گیا اور سیدنا علی رضی اللہ عنہ نے ان کی نمازہ جنازہ پڑھائی اور انہوں نے ہی آپ کی تدفین کی اور سیدنا ابوبکر رضی اللہ عنہ تک کو ان کے جنازہ اور تدفین کا پتہ نہ چلا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4820]

سیدنا امام جعفر صادق فرماتے ہیں: سیدہ فاطمہ رضی اللہ عنہا کا انتقال 21 سال کی عمر میں ہوا، جبکہ ان کی پیدائش رسول اللہ صلی اللہ علیہ وسلم کی ولادت کے اکتالیس سال بعد ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4821]

ام المومنین سیدہ عائشہ رضی اللہ عنہا فرماتی ہیں: نبی اکرم صلی اللہ علیہ وسلم (کی وفات) اور سیدہ فاطمہ رضی اللہ عنہا (کی وفات) کے درمیان دو ماہ (کا وقفہ) ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4822]