سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم ہمارے پاس تشریف لائے جبکہ آپ صلی اللہ علیہ وسلم کے ایک کندھے پر حسن اور دوسرے پر حسین (رضی اللہ عنہما) تھے، آپ صلی اللہ علیہ وسلم کبھی اس کا بوسہ لیتے تو کبھی اس کا، یہاں تک کہ ہمارے پاس پہنچے، تو ایک شخص نے عرض کیا: اے اللہ کے رسول صلی اللہ علیہ وسلم ! کیا آپ ان دونوں سے (اتنی زیادہ) محبت کرتے ہیں؟ آپ صلی اللہ علیہ وسلم نے فرمایا: ”جس نے ان دونوں سے محبت کی اس نے یقیناً مجھ سے محبت کی اور جس نے ان دونوں سے بغض رکھا اس نے درحقیقت مجھ سے بغض رکھا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4833]

سیدنا ابو سعید خدری رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”حسن اور حسین اہل جنت کے نوجوانوں کے سردار ہیں، سوائے دو خالہ زاد بھائیوں (عیسیٰ اور یحییٰ علیہما السلام) کے۔“
یہ حدیث کثیر اسناد سے صحیح ثابت ہے اور مجھے اس پر تعجب ہے کہ شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4834]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”حسن اور حسین اہل جنت کے نوجوانوں کے سردار ہیں، اور ان کے والد ان دونوں سے بہتر ہیں۔“
یہ حدیث اس اضافے کے ساتھ صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4835]