ابوالغریف سے روایت ہے، انہوں نے کہا: ہم سیدنا حسن بن علی رضی اللہ عنہما کے ہراول دستے میں بارہ ہزار لوگ تھے جن کی تلواروں سے اہل شام کے خلاف قتال کے لیے تیزی و تندی ٹپک رہی تھی، اور ہمارے امیر ابوالعمرطہ تھے، پس جب ہمارے پاس سیدنا حسن بن علی اور معاویہ (رضی اللہ عنہما) کی صلح کی خبر آئی تو شدتِ غصہ اور رنج سے ایسا محسوس ہوا جیسے ہماری کمر ٹوٹ گئی ہو، پھر جب سیدنا حسن بن علی کوفہ تشریف لائے تو ہم میں سے ایک شخص جس کی کنیت ابوعامر سفیان بن لیل تھی، ان کے پاس کھڑا ہوا اور کہنے لگا: اے مومنوں کو ذلیل کرنے والے! آپ پر سلام ہو، تو سیدنا حسن رضی اللہ عنہ نے فرمایا: ”اے ابوعامر! ایسا نہ کہو، میں نے مومنوں کو ذلیل نہیں کیا، بلکہ میں نے یہ ناپسند کیا کہ اقتدار کے حصول کے لیے انہیں (مسلمانوں کو) قتل کرواؤں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4872]

الشعبی سے روایت ہے کہ جب سیدنا حسن بن علی رضی اللہ عنہما نے معاویہ سے صلح کر لی تو نُخیلہ کے مقام پر ہمیں خطبہ دیا، آپ کھڑے ہوئے، اللہ کی حمد و ثنا بیان کی اور پھر فرمایا: ”بے شک دانائی میں سب سے بڑی دانائی تقویٰ ہے، اور عاجزی میں سب سے بڑی عاجزی گناہ و نافرمانی ہے، اور یقیناً یہ معاملہ جس میں میرا اور معاویہ کا اختلاف ہوا، یا تو اس شخص کا حق تھا جو مجھ سے زیادہ اس کا حقدار تھا، یا پھر یہ میرا حق تھا جسے میں نے مسلمانوں کی اصلاح اور ان کا خون بچانے کی خاطر معاویہ کے لیے چھوڑ دیا، ﴿وَإِنْ أَدْرِي لَعَلَّهُ فِتْنَةٌ لَكُمْ وَمَتَاعٌ إِلَى حِينٍ﴾ ”اور میں نہیں جانتا، شاید یہ تمہارے لیے ایک آزمائش ہو اور ایک مقررہ وقت تک کے لیے فائدہ اٹھانا ہو۔“ [سورة الأنبياء: 111] میں اپنی یہ بات کہہ کر اپنے لیے اور تمہارے لیے اللہ سے بخشش مانگتا ہوں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4873]