سیدنا سلیمان بن ابان رضی اللہ عنہ فرماتے ہیں: جب رسول اللہ صلی اللہ علیہ وسلم میدان بدر کی جانب روانہ ہوئے تو سیدنا سعد بن خیثمہ رضی اللہ عنہ اور ان کے والد دونوں ہی جہاد پرجانا چاہتے تھے۔ یہ بات رسول اللہ صلی اللہ علیہ وسلم کو بتائی گئی تو آپ صلی اللہ علیہ وسلم نے فرمایا کہ تم دونوں میں سے کوئی ایک جہاد پر جا سکتا ہے اس لئے تم قرعہ اندازی کرو۔ سیدنا خیثمہ بن الحارث رضی اللہ عنہ نے اپنے بیٹے سے کہا: عورتوں کے پاس بھی کسی کا ٹھہرنا ضروری ہے اس لئے تم گھر میں رک جاؤ۔ سیدنا سعد رضی اللہ عنہ نے کہا: اگر جنت کا معاملہ نہ ہوتا تو میں آپ کو اپنے آپ پر ترجیح دے دیتا۔ لیکن میں اسی جنگ میں شہادت کا طلبگار ہوں۔ تب ان دونوں میں قرعہ اندازی ہوئی اور قرعہ میں سیدنا سعد رضی اللہ عنہ کا نام نکلا، تو یہ رسول اللہ صلی اللہ علیہ وسلم کے ہمراہ جنگ بدر میں شریک ہوئے۔ اور عمرو بن عبدود نے ان کو شہید کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4927]

سیدنا ابورافع رضی اللہ عنہ فرماتے ہیں: رسول اللہ صلی اللہ علیہ وسلم اپنے اصحاب کے لئے کسی قبرستان کی تلاش میں تھے جہاں پر وہ اپنے فوت شدگان کی تدفین کیا کریں، آپ مدینہ منورہ کے گردونواح میں اس جگہ کی تلاش میں تھے۔ پھر آپ صلی اللہ علیہ وسلم نے فرمایا: مجھے اس جگہ (یعنی بقیع) کا حکم دیا گیا ہے۔ (اس کو بقیع الخبخبہ بھی کہتے ہیں) اس مقام پر اکثر طور پر غرقد نامی درخت اگتا تھا (اسی لئے اس کو بقیع الغرقد بھی کہا جاتا ہے) اس قبرستان میں سب سے پہلے سیدنا عثمان بن مظعون رضی اللہ عنہ کی تدفین ہوئی، بعد از تدفین رسول اللہ صلی اللہ علیہ وسلم نے (نشانی کے طور پر) ان کے سرہانے کی جانب ایک اینٹ رکھ دی، اور فرمایا: یہ ہمارے قاصد کی قبر ہے۔ اس کے بعد جب کبھی کسی مہاجر کا انتقال ہوتا تو لوگ پوچھتے: یا رسول اللہ صلی اللہ علیہ وسلم ہم اس کو کہاں دفن کریں؟ تو آپ فرماتے: ہمارے قاصد، سیدنا عثمان بن مظعون رضی اللہ عنہ کے قریب۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4928]

ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے سیدنا عثمان بن مظعون رضی اللہ عنہ کی وفات کے بعد ان کا بوسہ لیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4929]