سیدنا عبداللہ بن عباس رضی اللہ عنہما فرماتے ہیں: جب سیدنا عثمان بن مظعون رضی اللہ عنہ کا انتقال ہوا تو ان کی زوجہ محترمہ کہنے لگی: اے عثمان بن مظعون رضی اللہ عنہ تجھے جنت مبارک ہو، (یہ سن کر) رسول اللہ صلی اللہ علیہ وسلم نے ان کی جانب دیکھا اور فرمایا: تجھے کیسے پتا ہے؟ (کہ عثمان بن مظعون جنتی ہے) اس نے کہا: یا رسول اللہ صلی اللہ علیہ وسلم یہ آپ کا مجاہد ہے، آپ کا صحابی ہے۔ تو رسول اللہ صلی اللہ علیہ وسلم نے فرمایا: میں اللہ کا رسول ہوں، اس کے باوجود از خود نہیں جانتا کہ میرے ساتھ کیا ہو گا، چنانچہ لوگ سیدنا عثمان بن مظعون رضی اللہ عنہ کے معاملے میں خوف زدہ ہو گئے۔ پھر جب رسول اللہ صلی اللہ علیہ وسلم کی صاحبزادی سیدنا زینت رضی اللہ عنہا کا انتقال ہوا رسول اللہ صلی اللہ علیہ وسلم نے فرمایا: اس کو ہمارے اچھے گزرے ہوئے سیدنا عثمان بن مظعون رضی اللہ عنہ کے ساتھ ملا دو۔ پھر عورتیں رونے لگ گئیں، تو سیدنا عمر بن خطاب رضی اللہ عنہ ان کو اپنے کوڑے کے ساتھ مارنے لگ گئے، رسول اللہ صلی اللہ علیہ وسلم نے ان کا ہاتھ پکڑ کر فرمایا: اے عمر! ان کو چھوڑ دو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4930]

سیدنا مصعب بن عبداللہ الزبیری رضی اللہ عنہ نے ان کا نسب یوں بیان کیا ہے: جعدہ بن ہبیرہ بن ابی وہب بن عمرو بن عائذ ابن عمران بن مخزوم۔ ان کی والدہ سیدنا ابوطالب کی صاحبزادی سیدہ ام ہانی رضی اللہ عنہا تھیں، اور یہ ہبیرہ بن ابی وہب کے نکاح میں تھیں۔ جب یہ مسلمان ہوئیں تو ہبیرہ نے ان کے بارے میں درج ذیل اشعار کہے: * کیا تجھے ہند نے شوق دلایا ہے کہ اگر تیرے پاس کا سوال آئے تو تو ایسی جگہ پر قیام کرنا جہاں سے تیرا مال و دولت تجھ سے بہت دور ہو۔ مصعب کہتے ہیں: اور جعدہ کہتے تھے: * ایسا کون ہو سکتا ہے جو میرے ماموں کا انکار کر سکے، کیوںکہ میرے ماموں مٹی والے (یعنی جن کا لقب ابوتراب ہے) سیدنا علی رضی اللہ عنہ اور سیدنا عقیل رضی اللہ عنہ ہیں۔ مصعب کہتے ہیں: ہبیرہ نجران میں حالت شرک میں مرا تھا، اور جعدہ نے اپنے ماموں سیدنا علی کی بیٹی ام الحسن کے ساتھ نکاح کیا اور ان میں سے سیدنا عبداللہ بن جعدہ بن ہبیرہ پیدا ہوئے، ان کے بارے میں خراسان میں کہا گیا ہے۔ * اگر ابن جعدہ نہ ہوتے تو قہندز اور خراسان قیامت تک فتح نہ ہو سکتا۔ مصعب کہتے ہیں: سیدنا علی رضی اللہ عنہ نے سیدنا جعدہ بن ہبیرہ مخزومی رضی اللہ عنہ کو خراسان کا گورنر بنایا تھا پھر یہ عراق کی جانب لوٹ کر آ گئے، پھر فریضہ حج ادا کیا، اور مدینہ منورہ میں ان کا انتقال ہوا۔ یہ رسول اللہ صلی اللہ علیہ وسلم کی احادیث روایت کرتے ہیں اور ان کی مرویات کے صحیح ہونے کی دلیل یہ کہ اس کو سیدنا مصعب رضی اللہ عنہ نے ذکر کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4931]

سیدنا جعدہ بن ہبیرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: سب سے بہترین لوگ میرے زمانے کے ہیں، پھر وہ جو ان کے بعد ہوں گے، پھر وہ جو ان کے بعد ہوں گے، پھر ان کے بعد والے ہلاک ہوں گے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4932]