سیدنا علی ابن ابی طالب رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: ہر نبی کو سات ساتھی دیئے گئے جبکہ مجھے دس سے زیادہ ساتھی دیئے گئے ہیں۔ سیدنا علی رضی اللہ عنہ سے پوچھا گیا: وہ کون کون ہیں؟ تو آپ نے فرمایا: میں، سیدنا حمزہ رضی اللہ عنہ اور میرے دونوں بیٹے، پھر ان کے بعد باقی سب کا ذکر کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4962]

سیدنا سعید بن المسیب رضی اللہ عنہ فرماتے ہیں: سیدنا عبداللہ بن جحش رضی اللہ عنہ نے یوں دعا مانگی ” اے اللہ! میں تجھے قسم دیتا ہوں کہ کل جب میری دشمن سے مڈبھیڑ ہو تو وہ مجھے قتل کر دیں، میرا پیٹ چاک کر دیں، میرے ناک اور کان کاٹ ڈالیں، پھر تو مجھ سے پوچھے کہ یہ سب کس کے لئے ہوا؟ تو میں کہوں: صرف تیرے لئے۔ سیدنا سعید بن المسیب رضی اللہ عنہ فرماتے ہیں: مجھے امید واثق ہے کہ جس طرح ان کی دعا کا پہلا حصہ قبول ہوا ہے، اسی طرح اللہ تعالیٰ نے ان کی قسم کو بھی پورا کر دیا ہو گا۔ ٭٭ اگر اس میں ارسال نہ ہو تو یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4963]