ابراہیم بن اسحاق اپنے والد اور وہ اپنے دادا سے روایت کرتے ہیں کہ حنظلہ بن ابی عامر رضی اللہ عنہ نے نکاح کیا اور اس رات اپنی اہلیہ کے پاس رہے جس کی صبح غزوہ احد کا معرکہ ہونا تھا، جب انہوں نے صبح کی نماز پڑھ لی تو جمیلہ (ان کی اہلیہ) ان کو دوبارہ پکڑ لیا، وہ دوبارہ ان کے پاس چلے گئے اور ان سے ہم بستر ہوئے جس سے وہ جنبی ہو گئے، پھر وہ (غسل کا وقت نہ ملنے پر) رسول اللہ صلی اللہ علیہ وسلم کے ساتھ جا ملے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4978]

یحییٰ بن عباد بن عبداللہ اپنے والد اور وہ اپنے دادا سے روایت کرتے ہیں کہ میں نے رسول اللہ صلی اللہ علیہ وسلم کو حنظلہ بن ابی عامر کی شہادت کے وقت فرماتے ہوئے سنا، جبکہ ان کا اور ابوسفیان بن حارث کا سامنا ہوا تھا اور شداد بن اسود نے ان پر تلوار سے وار کر کے انہیں شہید کر دیا تھا، تو رسول اللہ صلی اللہ علیہ وسلم نے فرمایا: ”تمہارے ساتھی کو فرشتے غسل دے رہے ہیں، پس ان کی اہلیہ سے (اس کا سبب) پوچھو“، انہوں نے بتایا کہ جب انہوں نے جنگ کی پکار سنی تو وہ جنبی ہونے کی حالت میں ہی (بغیر غسل کیے) نکل کھڑے ہوئے تھے، رسول اللہ صلی اللہ علیہ وسلم نے فرمایا: ”اسی وجہ سے فرشتوں نے انہیں غسل دیا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4979]