سیدنا (عبداللہ) بن عمر رضی اللہ عنہما فرماتے ہیں: اللہ تعالیٰ کی سیدنا سعد رضی اللہ عنہ سے ملاقات کی خوشی میں عرش یعنی وہ تخت (جس پر آپ کے جسم اطہر کو رکھا گیا تھا) جھوما۔ پھر آپ نے یہ آیت پڑھی رَفَعَ اَبَوَیْہِ عَلَی الْعَرْشِ (اس آیت میں بھی عرش کا لفظ استعمال ہوا ہے لیکن اس کا معنی عرش نہیں ہے بلکہ اس سے مراد تخت ہے، اور وہ ہلا اس لئے تھا کہ) اس کے پائے پھولے ہوئے تھے۔ آپ فرماتے ہیں: رسول اللہ صلی اللہ علیہ وسلم سیدنا سعد کی قبر میں داخل ہوئے اور کچھ دیر بیٹھے رہے، جب آپ باہر تشریف لائے تو آپ صلی اللہ علیہ وسلم سے دیر لگانے کی وجہ پوچھی گئی تو آپ صلی اللہ علیہ وسلم نے فرمایا: ان پر قبر تنگ ہو رہی تھی میں ان کے لئے وسعت کی دعا کر رہا تھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4988]