سیدہ اسماء بنت یزید بن السکن الانصاریہ رضی اللہ عنہا فرماتی ہیں: جب سیدنا سعد رضی اللہ عنہ کا انتقال ہوا تو ان کی والدہ چیخ چیخ رونے لگی تو رسول اللہ صلی اللہ علیہ وسلم نے ارشاد فرمایا: تیرے آنسو خشک ہو جائیں گے اور تیرا غم ختم ہو گا، کیونکہ تیرا بیٹا وہ پہلا شخص ہے جس کی طرف رب ذوالجلال مسکرایا ہے اور اس کے لئے عرش ہل گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4989]

سیدنا انس رضی اللہ عنہ فرماتے ہیں: جب سیدنا سعد رضی اللہ عنہ کا جنازہ اٹھایا گیا تومنافقین کہنے لگے: اس کا جنازہ کتنا ہلکا ہے، اس نے بنی قریظہ کے خلاف جو فیصلہ کیا تھا اس کی وجہ سے ایسا ہوا۔ یہ بات رسول اللہ صلی اللہ علیہ وسلم تک پہنچی تو آپ صلی اللہ علیہ وسلم نے فرمایا: نہیں۔ بلکہ فرشتے ان کو اٹھا رہے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4990]

ام المومنین سیدہ عائشہ رضی اللہ عنہا فرماتی ہیں: ہم ایک سفر سے واپس لوٹے تو ذوالحلیفہ کے مقام پر کچھ لوگ ہمارے استقبال کے لئے آئے۔ یہ طریقہ تھا کہ جب قافلے واپس آتے تو انصار کے بچے ان کا استقبال کرتے تھے، وہ سیدنا اسید بن حضیر سے ملے اور ان کی بیوی کی وفات کی خبر سنائی، (اپنی بیوی کی وفات کی خبر سن کر) وہ سر ڈھانپ کر رونے لگ گئے، ام المومنین فرماتی ہیں: میں نے ان سے کہا: سبحان اللہ! آپ اصحاب رسول میں سے ہیں، سابقون الاولون میں سے ہیں، بڑی حیرانگی کی بات ہے کہ آپ بیوی کی وفات پر رو رہے ہیں، انہوں نے سر سے کپڑا ہٹایا اور بولے: آپ نے بے شک سچ فرمایا ہے، خدا کی قسم! سیدنا سعد بن معاذ رضی اللہ عنہ کی وفات کے بعد کسی کی موت پر رونا بنتا نہیں ہے، جبکہ رسول اللہ صلی اللہ علیہ وسلم کا ان کے بارے میں ارشاد بھی موجود ہے۔ ام المومنین نے ان سے پوچھا: کیا فرمایا ہے رسول اللہ صلی اللہ علیہ وسلم نے ان کے بارے میں؟ (سیدنا اسید بن حضیر رضی اللہ عنہ نے) کہا: یہ کہ سیدنا سعد بن معاذ رضی اللہ عنہ کی وفات پر عرش بھی ہل گیا۔ ام المومنین فرماتی ہیں: وہ میرے اور رسول اللہ صلی اللہ علیہ وسلم کے درمیان چلا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4991]