سیدہ اسماء بنت یزید بن سکن انصاریہ رضی اللہ عنہا سے روایت ہے کہ جب سیدنا سعد بن معاذ رضی اللہ عنہ کی وفات ہوئی تو ان کی والدہ چیخ مار کر روئیں، رسول اللہ صلی اللہ علیہ وسلم نے ان سے فرمایا: ”کیا تمہارے آنسو خشک نہیں ہوں گے اور تمہارا غم دور نہیں ہوگا؟ تمہارا بیٹا وہ پہلا شخص ہے جس کی طرف اللہ تعالیٰ نے (خوشی سے) تبسم فرمایا اور اس کے لیے عرش ہل اٹھا۔“
یہ حدیث صحیح الاسناد ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4989]

سیدنا انس رضی اللہ عنہ سے روایت ہے کہ جب سیدنا سعد بن معاذ رضی اللہ عنہ کا جنازہ اٹھایا گیا تو منافقین کہنے لگے: ان کا جنازہ کتنا ہلکا ہے، اور یہ صرف اس وجہ سے ہے کہ انہوں نے بنو قریظہ کے بارے میں (سخت) فیصلہ کیا تھا، جب یہ بات نبی کریم صلی اللہ علیہ وسلم تک پہنچی تو آپ صلی اللہ علیہ وسلم نے فرمایا: ”نہیں، بلکہ فرشتے ان کا جنازہ اٹھائے ہوئے تھے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4990]

سیدہ عائشہ رضی اللہ عنہا سے روایت ہے کہ ہم ایک سفر سے واپس آ رہے تھے تو ذوالحلیفہ کے مقام پر لوگ ہمارے استقبال کے لیے آئے، انصار کے لڑکے استقبال کے لیے آیا کرتے تھے، وہاں ان کی ملاقات سیدنا اسید بن حضیر سے ہوئی، لوگوں نے انہیں ان کی اہلیہ کی وفات کی خبر دی تو وہ چادر اوڑھ کر رونے لگے، میں نے ان سے کہا: سبحان اللہ! آپ رسول اللہ صلی اللہ علیہ وسلم کے صحابی ہیں اور آپ کا اسلام میں اتنا بڑا مقام ہے، پھر بھی آپ ایک عورت پر رو رہے ہیں؟ انہوں نے اپنے سر سے چادر ہٹائی اور کہا: تم نے سچ کہا، اللہ کی زندگی کی قسم! مجھے زیب دیتا ہے کہ میں سعد بن معاذ کے بعد کسی پر نہ روؤں، کیونکہ رسول اللہ صلی اللہ علیہ وسلم نے ان کے بارے میں وہ فرمایا جو فرمایا، میں نے پوچھا: آپ صلی اللہ علیہ وسلم نے ان کے بارے میں کیا فرمایا تھا؟ انہوں نے کہا: (آپ صلی اللہ علیہ وسلم نے فرمایا تھا:) ”سعد بن معاذ کی وفات پر عرش الٰہی ہل اٹھا“، عائشہ کہتی ہیں کہ اس وقت وہ (سعد) میرے اور رسول اللہ صلی اللہ علیہ وسلم کے درمیان چلا کرتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4991]