محمد بن اسحاق کہتے ہیں: سیدنا ثابت بن قیس بن شماس رضی اللہ عنہ جنگ یمامہ میں شہید ہوئے، سیدنا ابوبکر رضی اللہ عنہ نے ان کو سیدنا خالد بن ولید رضی اللہ عنہ کے ہمراہ انصار کا سپہ سالار بنایا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5100]

احمد بن یسار کہتے ہیں: سیدنا ثابت بن قیس بن شماس رضی اللہ عنہ کی کنیت ” ابوعبدالرحمن “ تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5101]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے فرمایا: ابوبکر رضی اللہ عنہ کتنا اچھا آدمی ہے، عمر رضی اللہ عنہ کتنا اچھا آدمی ہے، ابوعبیدہ بن جراح رضی اللہ عنہ کتنا اچھا آدمی ہے، ثابت بن قیس بن شماس رضی اللہ عنہ کتنا اچھا آدمی ہے، معاذ بن جبل رضی اللہ عنہ کتنا اچھا آدمی ہے، معاذ بن عمرو بن جموع رضی اللہ عنہ کتنا اچھا آدمی ہے۔ اور فلاں فلاں آدمی کتنا برا ہے، حضور صلی اللہ علیہ وسلم نے ان میں سات آدمیوں کا ذکر کیا، لیکن ان میں سہیل کا کہیں بھی تذکرہ نہیں کیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5102]