خلیفہ بن خیاط فرماتے ہیں: سیدنا سعید بن عاص کی والدہ جو کہ ام خالد کے نام سے مشہور ہیں، ان کا نام ” لبینہ بنت حباب بن عبدیالیل بن ناشب بن غیرۃ بن سعد بن لیث بن بکر بن عبدمناۃ بن علی بن کنانہ بن خزیمہ “ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5159]

محمد بن عبداللہ بن عمرو بن عثمان فرماتے ہیں: سیدنا سعید بہت پہلے پہل اسلام لے آئے تھے، یہ اپنے تمام بہن بھائیوں میں سے سب سے پہلے ایمان لائے تھے۔ ان کے اسلام لانے کا واقعہ یہ ہے کہ انہوں نے خواب میں دیکھا تھا کہ وہ دوزخ کے کنارے پر کھڑے ہیں اور ان کا باپ ان کو اس میں گرانے کی کوشش کر رہا ہے اور انہوں نے دیکھا کہ رسول اللہ صلی اللہ علیہ وسلم ان کو کمر بند سے پکڑے ہوئے ہیں کہ کہیں وہ دوزخ میں گر نہ جائے۔ وہ اس خواب سے خوفزدہ ہو کر گھبرا کر اٹھ گئے۔ انہوں نے کہا: میں اللہ کی قسم کھا کر کہتا ہوں کہ یہ خواب سچا ہے، پھر ان کی ملاقات سیدنا ابوبکر صدیق رضی اللہ عنہ کے ساتھ ہوئی، تو انہوں نے اپنی خواب کا ذکر سیدنا ابوبکر رضی اللہ عنہ کے سامنے کیا۔ سیدنا ابوبکر رضی اللہ عنہ نے کہا: میں آپ کے بارے میں بھلائی کا ہی ارادہ رکھتا ہوں۔ یہ رہے رسول اللہ صلی اللہ علیہ وسلم تم ان کی پیروی کر لو، کیونکہ عنقریب تم ان کی پیروی کرو گے اور ان کے ساتھ اسلام میں داخل ہو گا اور اسلام تجھے دوزخ میں داخل ہونے سے بچائے گا اور تیرا باپ اس میں گر چکا ہے۔ تو وہ رسول اللہ صلی اللہ علیہ وسلم سے ملے اس وقت حضور صلی اللہ علیہ وسلم اجیاد میں تھے، انہوں نے پوچھا: اے محمد! آپ کس چیز کی دعوت دیتے ہیں؟ آپ صلی اللہ علیہ وسلم نے فرمایا کہ میں اس بات کی دعوت دیتا ہوں کہ اللہ وحدہ لا شریک ہے اور بے شک محمد اللہ کے بندے اور اس کے رسول ہیں۔ اور اب تک تم جن پتھروں کی عبادت کرتے رہے ہو جو تمہیں نہ کوئی فائدہ پہنچا سکتے ہیں (اگر تم ان کی عبادت کرو) اور نہ تمہیں کوئی نقصان دے سکتے ہیں (اگر تم ان کی عبادت سے انکار کرو) جو اپنے عبادت گزاروں اور اپنے منکروں کی پہچان نہیں رکھتے، تم ان کی عبادت چھوڑ دو۔ سیدنا خالد رضی اللہ عنہ نے کہا: تو میں گواہی دیتا ہوں کہ بے شک اللہ کے سوا کوئی عبادت کے لائق نہیں ہے اور میں یہ بھی گواہی دیتا ہوں کہ بے شک آپ اللہ کے رسول ہیں۔ (ان کے والد کو ان کے اسلام قبول کرنے کا پتا چل گیا) ان کے باپ نے اپنے غیر مسلم بیٹوں کو اور اپنے آزاد کردہ غلام رافع کو انہیں ڈھونڈنے کے لئے بھیجا، ان لوگوں کو وہ مل گئے، انہوں نے سیدنا خالد رضی اللہ عنہ کو ان کے باپ ابواحیحہ کے پاس پیش کر دیا، اس نے سیدنا خالد رضی اللہ عنہ کو بہت ڈانٹا اور جھڑکا اور ان کے ہاتھ میں ایک چھڑی تھی اس کے ساتھ ان کو بہت مارا حتی کہ ان کے سر پر مار مار کر یہ چھڑی توڑ ڈالی اور کہنے لگا: تو نے محمد کی پیروی کر لی؟ حالانکہ تو دیکھ رہا ہے کہ وہ اپنی قوم کا مخالف ہے، ان کے معبودوں کی توہین کرتا ہے، اپنے آباء و اجداد کو برا کہتا ہے۔ سیدنا خالد رضی اللہ عنہ نے کہا: خدا کی قسم! وہ سچ کہتے ہیں، اور ہاں میں نے واقعی ان کی پیروی کر لی ہے۔ اس پر ابواحیحہ بہت غضبناک ہوا اور ان کو گالیاں بکنے لگا، پھر اس نے کہا: اے کمینے انسان تیرا جہاں دل چاہتا ہے دفع ہو جا، خدا کی قسم! میں تیرا کھانا پینا بند کر دوں گا۔ سیدنا خالد رضی اللہ عنہ نے کہا: اگر تو میرا رزق روک لے گا تو کوئی بات نہیں بے شک اللہ تعالیٰ زندگی بھر مجھے رزق دے گا۔ یہ کہہ کر ان کے باپ نے ان کو گھر سے نکال دیا اور ساتھ ہی اپنے دوسرے بیٹوں سے کہا: اگر کسی نے اس کے ساتھ کوئی تعلق رکھا تو میں اس کے ساتھ بھی وہی حشر کروں گا جو اس کے ساتھ کیا ہے۔ تو سیدنا خالد رضی اللہ عنہ رسول اللہ صلی اللہ علیہ وسلم کی خدمت میں چلے آئے، نبی اکرم صلی اللہ علیہ وسلم ان کی بہت عزت و تکریم کیا کرتے تھے۔ اس کے بعد سیدنا خالد نبی اکرم صلی اللہ علیہ وسلم کے پاس رہنے لگ گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5160]