سیدنا مصعب بن عبداللہ بن زبیر فرماتے ہیں: حارث بن عبدالمطلب کی اولادوں میں سے جو لوگ صحابی رسول ہوئے ان میں سے ابوسفیان بن حارث بن عبدالمطلب رضی اللہ عنہ ہیں۔ رسول اللہ صلی اللہ علیہ وسلم نے ان کے بارے میں فرمایا: یہ میرے اچھے رشتہ دار ہیں۔ اور یہ بھی فرمایا کہ یہ جنتی نوجوانوں کے سردار ہیں۔ اور جنگ حنین کے دن رسول اللہ صلی اللہ علیہ وسلم کے ہمراہ ثابت قدم رہے۔ رسول اللہ صلی اللہ علیہ وسلم نے ان کو منہ اندھیرے دیکھا اور پوچھا: یہ کون ہے؟ تو جواب ملا کہ یا رسول اللہ صلی اللہ علیہ وسلم یہ آپ کی ماں کا بیٹا ہے۔ اور یہ بھی کہ حلاق (سر مونڈنے والے) نے ان کا سر مونڈا تو ان کے سر کی ایک ابھری ہوئی رگ کٹ گئی، جس سے خون بہنا شروع ہو گیا حتی کہ ان کا انتقال ہو گیا۔ یہ 20 ویں ہجری کی بات ہے۔ سیدنا عمر بن خطاب رضی اللہ عنہ نے ان کی نماز جنازہ پڑھائی۔ رسول اللہ صلی اللہ علیہ وسلم جب فتح مکہ کے لئے مکہ کی جانب آ رہے تھے اس وقت ابوسفیان نے مکہ سے باہر نکل کر راستے میں ہی رسول اللہ صلی اللہ علیہ وسلم سے ملاقات کی اور فتح مکہ سے پہلے ہی اسلام لے آئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5195]

ابراہیم بن منذر فرماتے ہیں: ابوسفیان بن حارث بن عبدالمطلب رضی اللہ عنہ کا نام مغیرہ تھا، 20 ہجری کو ان انتقال ہوا اور سیدنا عمر بن خطاب رضی اللہ عنہ نے ان کی نماز جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5196]

سماک بن حرب فرماتے ہیں: ہم مدرک بن مہلب کے ہمراہ ایک خیمے میں تھے۔ میں نے ” ایک بزرگ کو سیدنا ابوسفیان کے حوالے سے نبی اکرم صلی اللہ علیہ وسلم کا یہ ارشاد بیان کرتے ہوئے سنا ہے “ اللہ تعالیٰ اس قوم پر کبھی رحم نہیں فرماتا جس کے ضعیف، طاقتوروں سے سخت کلامی کئے بغیر اپنا حق وصول نہیں کرتے۔ مذکورہ سند میں جس محدث کا نام نہیں لیا گیا وہ عثمان بن جبلہ ہیں انہوں نے شعبہ سے، انہوں نے سماک سے روایت کیا ہے۔ غندر نے اپنی سند میں ان کا نام ذکر کیا ہے لیکن انہوں نے اسناد میں ابوسفیان کا نام نہیں لیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5197]