سیدنا طفیل بن عمرو رضی اللہ عنہ سے روایت ہے کہ ہم نے عرض کیا: یا رسول اللہ! ہمیں (لشکر کا) دایاں بازو بنا دیں اور ہمارا شعار (جنگی نعرہ) «يَا مَبْرُورُ» ”اے نیکی پانے والے“ مقرر فرما دیں، آپ صلی اللہ علیہ وسلم نے ایسا ہی کیا، چنانچہ آج تک تمام قبیلہ ازد کا شعار ”مبرور“ ہی ہے۔
یہ حدیث صحیح الاسناد ہے بشرطیکہ یہ مرسل نہ ہو۔ اور عمرو بن طفیل بن عمرو نے بھی رسول اللہ صلی اللہ علیہ وسلم کا عہد پایا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5213]

محمد بن عمر کہتے ہیں کہ عمرو بن طفیل کے والد طفیل بن عمرو رضی اللہ عنہ رسول اللہ صلی اللہ علیہ وسلم کے وصال تک آپ صلی اللہ علیہ وسلم کے ساتھ رہے، پھر جب اہل عرب مرتد ہوئے تو وہ جہاد کے لیے نکلے یہاں تک کہ مسلمان طلیحہ (کذاب) اور تمام سرزمین نجد کے فتنے سے فارغ ہو گئے، پھر وہ مسلمانوں کے ساتھ یمامہ کی طرف بڑھے اور ان کے ہمراہ ان کے بیٹے عمرو بن طفیل بھی تھے، عمرو بن طفیل (میدانِ جنگ میں) نکلے تو زخمی ہوئے اور ان کا ہاتھ کٹ گیا، پھر وہ شفایاب ہوئے اور ان کا زخم ٹھیک ہو گیا، ایک بار وہ سیدنا عمر بن خطاب رضی اللہ عنہ کے پاس بیٹھے تھے کہ کھانا لایا گیا تو وہ (اپنے کٹے ہوئے ہاتھ کی وجہ سے) کھانے سے ایک طرف ہٹ گئے، سیدنا عمر رضی اللہ عنہ نے فرمایا: تمہیں کیا ہوا جو تم ہٹ گئے، کیا اپنے ہاتھ کی وجہ سے؟ انہوں نے عرض کیا: جی ہاں، سیدنا عمر رضی اللہ عنہ نے فرمایا: اللہ کی قسم! میں اس وقت تک کھانا نہیں چکھاوں گا جب تک تمہارے (کٹے ہوئے) ہاتھ کو اس میں شامل نہ کر لوں، اللہ کی قسم! اس پوری قوم میں تمہارے سوا کوئی ایسا نہیں ہے جس کا کوئی عضو (ہاتھ) تم سے پہلے جنت میں جا چکا ہو، پھر وہ سیدنا عمر رضی اللہ عنہ کے عہد میں مسلمانوں کے ساتھ جنگ یرموک میں نکلے اور وہاں جامِ شہادت نوش کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5214]