سیدہ عائشہ رضی اللہ عنہا فرماتی ہیں کہ ہم ایک سفر سے واپس آ رہے تھے تو ذوالحلیفہ کے مقام پر لوگوں نے ہمارا استقبال کیا، انصار کے لڑکے استقبال کے لیے آیا کرتے تھے، وہ اسید بن حضیر سے ملے اور انہیں ان کی اہلیہ کی وفات کی خبر دی، یہ سن کر اسید سر ڈھانپ کر رونے لگے، عائشہ رضی اللہ عنہ کہتی ہیں: میں نے ان سے کہا: ”سبحان اللہ! آپ رسول اللہ صلی اللہ علیہ وسلم کے جلیل القدر صحابی ہیں اور آپ کو اسلام میں سبقت حاصل ہے، کیا آپ ایک عورت پر رو رہے ہیں؟“ تو انہوں نے اپنے سر سے کپڑا ہٹایا اور فرمایا: ”آپ نے سچ کہا، اور اللہ کی قسم! سعد بن معاذ کی وفات کے بعد اب مجھ پر یہ حق ہے کہ میں کسی اور کے لیے نہ روؤں جبکہ رسول اللہ صلی اللہ علیہ وسلم نے ان کے بارے میں وہ بات فرمائی جو فرمائی“، میں نے ان سے پوچھا: آپ صلی اللہ علیہ وسلم نے کیا فرمایا تھا؟ انہوں نے کہا: آپ صلی اللہ علیہ وسلم نے فرمایا تھا: ”بیشک سعد بن معاذ کی وفات پر عرشِ الٰہی جھوم اٹھا“، عائشہ فرماتی ہیں کہ اس گفتگو کے وقت اسید بن حضیر میرے اور رسول اللہ صلی اللہ علیہ وسلم کے درمیان چل رہے تھے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔
عیاض بن غنم اشعری رضی اللہ عنہ کے مناقب کا ذکر۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5347]