سیدنا انس بن مالک رضی اللہ عنہ کہا کرتے تھے: براء بن مالک سریلی آواز والا شخص ہے، ایک سفر میں یہ رسول اللہ صلی اللہ علیہ وسلم کے لئے رجز پڑھ رہے تھے کہ کچھ عورتیں ان کے قریب جمع ہو گئیں۔ تو رسول اللہ صلی اللہ علیہ وسلم نے فرمایا شیشے کی بوتلوں کو بچاؤ۔ تو وہ چپ کر گئے۔ محمد کہتے ہیں: اس کی وجہ یہ تھی کہ رسول اللہ صلی اللہ علیہ وسلم کو یہ پسند نہیں تھا کہ عورتیں ان کی آواز کو سنیں۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5355]

سیدنا انس بن مالک رضی اللہ عنہ فرماتے ہیں: رسول صلی اللہ علیہ وسلم نے ارشاد فرمایا: بہت سارے ایسے لوگ جو اپنے آپ کو کمزور بنا کر پیش کرتے ہیں، پرانے، بوسیدہ خستہ حال کپڑے پہنے ہوتے ہیں (لیکن اللہ کی بارگاہ میں ان کا مقام یہ ہوتا ہے کہ) اگر وہ اللہ تعالیٰ پر کوئی قسم کھا لیں تو اللہ تعالیٰ ان کی قسم کو پورا کرتا ہے۔ سیدنا براء بن مالک رضی اللہ عنہ بھی انہیں میں سے ہیں۔ کیونکہ سیدنا براء کی مشرکوں کی ایک جماعت سے مڈبھیڑ ہو گئی، جبکہ مشرکوں نے مسلمانوں میں بھگدڑ مچا رکھی تھی، لوگوں نے کہا: اے براء! بے شک رسول صلی اللہ علیہ وسلم نے ارشاد فرمایا: اگر تم اللہ پر قسم کھا لو تو اللہ تعالیٰ تمہاری قسم کو پورا کرے گا۔ اس لئے تم اپنے رب پر قسم کھاؤ۔ انہوں نے کہا: اے میرے رب! میں تجھ پر قسم کھاتا ہوں، تو ہمیں فتح و نصرت سے ہمکنار فرما۔ پھر سوس کے پل پر ان کی مڈبھیڑ ہوئی، اس بار بھی انہوں نے مسلمانوں کو تکلیف پہنچائی، اور پھر سیدنا براء سے کہا: اے براء! اپنے رب پر قسم کھاؤ، انہوں نے پھر کہا: میں اپنے رب پر قسم کھاتا ہوں، اے میرے رب! ہمیں فتح و نصرت سے ہمکنار فرما اور تو مجھے اپنے نبی کے ساتھ ملا دے۔ چنانچہ مسلمانوں کو فتح نصیب ہوئی اور اسی جنگ میں سیدنا براء شہید ہو گئے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5356]