سیدنا عبد الرحمن بن حاطب بن ابی بلتعہ رضی اللہ عنہ سے روایت ہے کہ ان کے والد (سیدنا حاطب رضی اللہ عنہ) نے کفارِ قریش کی طرف ایک خط لکھا جبکہ وہ رسول اللہ صلی اللہ علیہ وسلم کے ساتھ مدینہ میں مقیم تھے اور وہ غزوہ بدر میں شریک ہو چکے تھے، تو رسول اللہ صلی اللہ علیہ وسلم نے سیدنا علی اور سیدنا زبیر رضی اللہ عنہما کو بلایا اور فرمایا: ”تم دونوں جاؤ یہاں تک کہ تم اس عورت کو جا لو جس کے پاس ایک خط ہے، پس وہ خط میرے پاس لے کر آؤ۔“ چنانچہ وہ دونوں روانہ ہوئے اور اسے جا لیا، اور اس سے کہا: تمہارے پاس جو خط ہے وہ ہمیں دے دو، اور انہوں نے اسے واضح کر دیا کہ وہ اسے اس وقت تک نہیں چھوڑیں گے جب تک کہ تلاشی کے لیے اس کے تمام کپڑے نہ اتروا لیں، اس پر اس نے کہا: کیا تم دونوں مسلمان مرد نہیں ہو؟ انہوں نے کہا: کیوں نہیں، لیکن رسول اللہ صلی اللہ علیہ وسلم نے ہمیں خبر دی ہے کہ تمہارے پاس ایک خط ہے، جب اسے یقین ہو گیا کہ وہ ان سے بچ کر نہیں نکل سکے گی تو اس نے اپنے سر کے بالوں کے جوڑے سے خط نکالا اور انہیں دے دیا، پھر رسول اللہ صلی اللہ علیہ وسلم نے حاطب کو بلایا اور ان کے سامنے وہ خط پڑھ کر سنایا، آپ صلی اللہ علیہ وسلم نے پوچھا: ”کیا تم اس خط کو پہچانتے ہو؟“ انہوں نے عرض کی: جی ہاں، آپ صلی اللہ علیہ وسلم نے دریافت فرمایا: ”تمہیں اس عمل پر کس چیز نے ابھارا؟“ انہوں نے عرض کی: وہاں میری اولاد اور قریبی رشتہ دار تھے جبکہ میں آپ قریشیوں میں ایک اجنبی شخص تھا، اس پر سیدنا عمر رضی اللہ عنہ نے عرض کی: اے اللہ کے رسول! مجھے اجازت دیں کہ میں حاطب کو قتل کر دوں، تو رسول اللہ صلی اللہ علیہ وسلم نے ارشاد فرمایا: ”نہیں، وہ غزوہ بدر میں شریک رہا ہے، اور تمہیں کیا معلوم شاید اللہ تعالیٰ نے اہلِ بدر کے احوال پر مطلع ہو کر فرما دیا ہو: تم جو چاہو عمل کرو، میں نے تمہیں بخش دیا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5393]