سیدنا عبدالرحمن بن حاطب ابن ابی بلتعہ رضی اللہ عنہ فرماتے ہیں: ان کے والد جنگ بدر میں حضور صلی اللہ علیہ وسلم کے ہمراہ شریک تھے، انہوں نے کفار قریش کی جانب ایک خط لکھا۔ حالانکہ اس وقت وہ رسول اللہ صلی اللہ علیہ وسلم کے ہمراہ تھے۔ رسول اللہ صلی اللہ علیہ وسلم (چونکہ عطائے الٰہی سے غیب جانتے ہیں اس لئے آپ صلی اللہ علیہ وسلم کو اس خط کا پتا تھا اس لئے) حضور صلی اللہ علیہ وسلم نے سیدنا علی رضی اللہ عنہ اور سیدنا زبیر رضی اللہ عنہ کو بلا کر فرمایا: تم جاؤ، تمہیں فلاں مقام پر ایک عورت ملے گی، اس کے پاس ایک خط ہو گا تم وہ خط میرے پاس لاؤ، وہ دونوں (حکم رسول اللہ صلی اللہ علیہ وسلم پا کر) چل دیئے، اور اس عورت تک جا پہنچے، اس سے خط مانگا، اور ساتھ یہ بھی واضح کر دیا کہ تجھ سے خط برآمد کرنے کے لئے اگر انہیں اس کے جسم کے تمام کپڑے بھی اتارنے پڑے تو وہ اس میں ذرا بھی تامل نہیں کریں گے۔ اس عورت نے کہا: کیا تم دونوں مسلمان نہیں ہو؟ انہوں نے کہا: بے شک ہم مسلمان ہیں لیکن ہمیں رسول اللہ صلی اللہ علیہ وسلم نے یہ بتا دیا ہے کہ تیرے پاس وہ خط ہے (اس لئے وہ خط لئے بغیر ہم یہاں سے واپس نہیں جائیں گے) جب اس کو یقین ہو گیا کہ ان لوگوں کو خط دیئے بغیر کوئی چارہ نہیں ہے تو اس نے اپنے سر کے بالوں میں چھپا ہوا خط نکال کر ان کے حوالے کر دیا۔ (یہ خط لے کر وہ دونوں رسول اللہ صلی اللہ علیہ وسلم کی بارگاہ میں حاضر ہوئے اور خط رسول اللہ صلی اللہ علیہ وسلم کے حوالے کر دیا) رسول اللہ صلی اللہ علیہ وسلم نے سیدنا حاطب کو بلا کر ان کا خط ان کے سامنے پڑھا اور فرمایا: کیا تم اس خط کو جانتے ہو؟ اس نے اقرار کر لیا۔ رسول اللہ صلی اللہ علیہ وسلم نے پوچھا: تم نے یہ حرکت کیوں کی؟ انہوں نے کہا: مکہ میں میرے بچے اور قریبی رشتہ دار موجود ہیں اور قریشیوں کے اندر میں اجنبی تھا (اس لئے میں نے ان کو مطلع کر دیا تھا) سیدنا عمر رضی اللہ عنہ نے کہا: یا رسول اللہ صلی اللہ علیہ وسلم مجھے اجازت دیجئے، میں حاطب کو قتل کر دوں، رسول اللہ صلی اللہ علیہ وسلم نے اس بات کی اجازت نہیں دی اور فرمایا: یہ جنگ بدر میں شریک ہوئے ہیں، اور کیا تمہیں معلوم نہیں ہے کہ اللہ تعالیٰ نے اہل بدر پر خوش ہو کر فرمایا: تم جو چاہو کرو، میں نے تمہیں بخش دیا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5393]