محمد بن عبداللہ بن عمر فرماتے ہیں: سیدنا عبدالرحمن بن عوف رضی اللہ عنہ نے 75 سال کی عمر میں سن 32 ہجری کو انتقال کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5423]

سیدنا ابراہیم بن عبدالرحمن بن عوف رضی اللہ عنہ فرماتے ہیں: سیدنا عبدالرحمن رضی اللہ عنہ پر شدت درد کی وجہ سے غشی طاری ہو گئی، لوگوں نے یہ سمجھا کہ شاید ان کی روح پرواز کر گئی ہے۔ اس لئے لوگ ان کے اردگرد جمع ہو گئے اور ان پر ایک چادر ڈال دی۔ ان کی بیوی سیدہ ام کلثوم بنت عقبہ رضی اللہ عنہا اس مصیبت میں الله تعالیٰ کے حکم کے مطابق صبر اور نماز سے مدد حاصل کرنے کے لئے مسجد میں آ گئیں۔ کچھ دیر تک تو سیدنا عبدالرحمن پر غشی طاری رہی لیکن بعد میں غشی جاتی رہی، جب غشی ختم ہوئی تو ان کی زبان سے سب سے پہلے یہ لفظ نکلے ”تکبیر کہو“ تو تمام گھر والوں نے اور جو لوگ اس وقت وہاں موجود تھے سب نے اللہ اکبر کہا۔ پھر سیدنا عبدالرحمن رضی اللہ عنہ نے ان سے پوچھا: کیا ابھی مجھ پر غشی طاری ہوئی تھی؟ لوگوں نے کہا: جی ہاں۔ انہوں نے کہا: جی ہاں تم واقعی سچ بول رہے ہو، ابھی میری غشی کے دوران دو آدمی میرے پاس آئے ان میں سے ایک آدمی بہت سخت تھا۔ ان دونوں نے مجھ سے کہا:، چلئے۔ ہم تمہارا فیصلہ ملک العزیز کی بارگاہ سے کرواتے ہیں۔ اور اس ملک العزيز (اللہ تعالیٰ) نے فرمایا: اس کو واپس لے جاؤ کیونکہ الله تعالیٰ نے اس کے لئے نیک بختی اور مغفرت اس وقت لکھ دی تھی جب ابھی یہ ماں کے پیٹ میں تھے۔ اس کی اولادیں کچھ عرصہ مزید (جتنا اللہ چاہے گا) اس سے فائدہ حاصل کریں گی۔ چنانچہ اس کے بعد پورا ایک مہینہ سیدنا عبدالرحمن زندہ رہے۔ اس کے بعد ان کی وفات ہوئی، اسی ماہ میں سیدنا عثمان رضی اللہ عنہ نے ان کی نماز جنازہ پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5424]

سیدنا عبدالرحمن بن عوف رضی اللہ عنہ فرماتے ہیں: امیہ بن خلف نے کہا: تم مجھ سے اسی نام کے ساتھ خط و کتابت کیا کرو . جس نام کے ساتھ پہلے کیا کرتے تھے (یعنی) ” عبد عمرو “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5425]