ام المومنین سیدہ ام سلمہ رضی اللہ عنہا فرماتی ہیں: رسول اللہ صلی اللہ علیہ وسلم نے اپنی ازواج سے فرمایا: میرے بعد جو شخص تم پر مہربانی کرے گا وہ نیک اور سچا انسان ہو گا۔ اے اللہ! عبدالرحمن بن عوف رضی اللہ عنہ کو جنت کی نہر سے سیراب فرما۔ ٭٭ ام المومنین سیدہ عائشہ رضی اللہ عنہا اور ام المومنین سیدہ ام سلمہ رضی اللہ عنہا سے مروی حدیث صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5440]

ابراہیم بن عبدالرحمن بن عوف اپنے والد کا یہ بیان نقل کرتے ہیں کہ رسول الله صلی اللہ علیہ وسلم نے ارشاد فرمایا: اے ابن عوف رضی اللہ عنہ بے شک تم اغنیاء میں سے ہو، تم جنت میں گھسٹتے ہوئے داخل ہو گے، اس لئے تم اللہ کی راہ میں خرچ کیا کرو، اللہ تعالیٰ اس کی برکت سے تمہارے قدم کھول دے گا۔ سیدنا عبدالرحمن بن عوف رضی اللہ عنہ نے پوچھا: یا رسول اللہ صلی اللہ علیہ وسلم میں کتنا مال الله کی راہ میں خرچ کروں؟ رسول اللہ صلی اللہ علیہ وسلم نے فرمایا: تم (مال کی) جن آلائیشوں میں مبتلا ہو، اس سے نکل آؤ، انہوں نے پوچھا: یا رسول الله صلی اللہ علیہ وسلم کیا اپنے تمام مال سے؟ آپ صلی اللہ علیہ وسلم نے فرمایا: ہاں۔ سیدنا عبدالرحمن بن عوف رضی اللہ عنہ وہاں سے باہر نکلے تو ان کو یہ حکم بہت بوجھل لگ رہا تھا۔ رسول اللہ صلی اللہ علیہ وسلم نے ان کی جانب پیغام بھیجا کہ میرے پاس جبریل امین علیہ السلام آئے اور مجھے کہا: ابن عوف سے کہہ دیں کہ مہمانوں کی مہمان نوازی کیا کرے، مسکینوں کو کھانا کھلایا کرے، مانگنے والوں کو دیا کرے، اور قریبی رشتہ داروں کو مقدم رکھے۔ جب وہ عمل یہ اختیار کر لے گا تو مال و دولت کی جن آلائیشوں میں وہ مبتلا ہے، ان سب سے وہ پاک ہو جائے گا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5441]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم میں سے بہترین شخص وہ ہے جو میرے بعد میرے گھر والوں کے حق میں سب سے زیادہ بہتر ہو گا۔ سیدنا ابوسلمہ بن عبدالرحمن سے مروی ہے کہ ان کے والد نے امہات المومنین کے لئے اپنا باغ وصیت کیا۔ وہ باغ ان کی وفات کے بعد چالیس ہزار دینار میں بیچا گیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اور اس کی ایک شاہد حدیث بھی موجود ہے جو کہ امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ (جو کہ درج ذیل ہے) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5442]