ام بکر بنت مسور سے روایت ہے کہ سیدنا عبد الرحمن بن عوف رضی اللہ عنہ نے اپنی ایک زمین چالیس ہزار دینار میں فروخت کی، پھر اس رقم کو بنو زہرہ، فقراء المسلمین، مہاجرین اور نبی کریم صلی اللہ علیہ وسلم کی ازواجِ مطہرات میں تقسیم کر دیا، انہوں نے سیدہ عائشہ رضی اللہ عنہا کی خدمت میں بھی اس مال میں سے کچھ حصہ بھیجا تو انہوں نے پوچھا: ”یہ مال کس نے بھیجا ہے؟“ میں نے عرض کی: ”عبد الرحمن بن عوف نے“، اور انہیں پورا واقعہ سنایا، اس پر انہوں نے فرمایا کہ رسول اللہ صلی اللہ علیہ وسلم نے ارشاد فرمایا تھا: ”میرے بعد تمہارے ساتھ وہی حسنِ سلوک کریں گے جو صابر ہوں گے“، اللہ تعالیٰ ابنِ عوف کو جنت کے سلسبیل چشمے سے سیراب فرمائے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5439]

سیدہ ام سلمہ رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم کو اپنی ازواج سے فرماتے ہوئے سنا: ”میرے بعد تمہارے ساتھ وہی حسنِ سلوک کرے گا جو سچا اور نیکوکار ہوگا۔“ (پھر انہوں نے دعا دی:) ”اے اللہ! عبد الرحمن بن عوف کو جنت کے سلسبیل چشمے سے سیراب فرما۔“
یہ حدیث سیدہ عائشہ اور سیدہ ام سلمہ رضی اللہ عنہما دونوں سے صحیح ثابت ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5440]