سیدنا قبیصہ بن جابر الاسدی رضی اللہ عنہ فرماتے ہیں: میں حالت احرام میں تھا، میں نے ایک ہرن دیکھا، اس پر تیر چلا دیا اور تیر ٹھیک نشانے پر جا لگا۔ جس کی وجہ سے ہرن ہلاک ہو گیا۔ میرے دل میں اس کی خلش پیدا ہوئی۔ میں یہ مسئلہ سیدنا عمر بن خطاب رضی اللہ عنہ کے پاس پوچھنے آیا۔ میں نے ان کے پہلو میں ایک سفید رنگ کے بزرگ بیٹھے ہوئے دیکھے جن کا چہرا دبلا پتلا تھا، وہ سیدنا عبدالرحمن بن عوف رضی اللہ عنہ تھے۔ میں نے سیدنا عمر رضی اللہ عنہ سے مسئلہ پوچھا تو انہوں نے سیدنا عبدالرحمن بن عوف رضی اللہ عنہ سے پوچھا: آپ کا کیا خیال ہے ان کو ایک بکری کفایت کرے گی؟ انہوں نے کہا: جی ہاں۔ سیدنا عمر رضی اللہ عنہ نے مجھے حکم دیا کہ میں ایک بکری ذبح کر دوں۔ جب ہم ان کے پاس سے اٹھ کر آنے لگے تو میرے ساتھی نے کہا: امیرالمومنین نے اچھا نہیں کیا کہ پہلے ایک آدمی سے پوچھا پھر تمہیں فتویٰ دیا۔ سیدنا عمر رضی اللہ عنہ نے اس کی اس سرگوشی کو سن لیا، آپ نے اس کو ایک درہ لگایا۔ پھر مجھے بھی مارنے لگے تو میں نے کہا: اے امیرالمومنین! میں نے تو کچھ نہیں کہا۔ جو کچھ کہا ہے اسی نے کہا ہے۔ سیدنا قبیصہ کہتے ہیں: سیدنا عمر رضی اللہ عنہ نے مجھے چھوڑ دیا۔ پھر میں نے سوچا کہ فتویٰ کی پرواہ کئے بغیر حرام چیزوں کو قتل کروں۔ پھر امیرالمومنین نے کہا: انسان میں دس خصلتیں ہوں، ان میں سے نو خصلتیں اچھی اور ایک بری ہو تو وہی ایک بری خصلت انسان کو برباد کر دیتی ہے۔ پھر فرمایا: جوانی کی لغزشوں سے بچ کر رہو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5438]

ام بکر بنت مسور فرماتی ہیں کہ سیدنا عبدالرحمن بن عوف رضی اللہ عنہ نے اپنی زمین چالیس ہزار دینار کے بدلے بیچی اور وہ دینار بنی زہرہ، مسلمان فقراء، مہاجرین اور نبی اکرم صلی اللہ علیہ وسلم کی ازواج میں تقسیم کر دیئے، ان میں سے ام المومنین سیدہ عائشہ رضی اللہ عنہا کی جانب بھی کچھ مال بھیجا، انہوں نے دریافت کیا کہ یہ مال کس نے بھیجا ہے؟ میں نے کہا: سیدنا عبدالرحمن بن عوف رضی اللہ عنہ نے۔ اور (ان کے جائیداد بیچنے اور مال تقسیم کرنے کا پورا قصہ بھی) بیان کر دیا۔ ام المومنین سیدہ عائشہ رضی اللہ عنہا نے فرمایا: رسول الله صلی اللہ علیہ وسلم نے ارشاد فرمایا: میرے بعد صرف صابر لوگ ہی تم پر مہربانی کریں گے۔ اللہ تعالیٰ ابن عوف رضی اللہ عنہ کو جنت کی نہر سے سیراب کرے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5439]