سیدنا عمرو بن حریث رضی اللہ عنہ سے روایت ہے کہ نبی کریم صلی اللہ علیہ وسلم نے سیدنا عبد اللہ بن مسعود رضی اللہ عنہ سے فرمایا: ”قرآن پڑھ کر سناؤ“، انہوں نے عرض کی: میں آپ کو پڑھ کر سناؤں حالانکہ یہ آپ ہی پر نازل ہوا ہے؟! آپ صلی اللہ علیہ وسلم نے فرمایا: ”بلاشبہ میں پسند کرتا ہوں کہ اسے اپنے علاوہ کسی اور سے سنوں“، چنانچہ انہوں نے سورۃ النساء کی تلاوت شروع کی یہاں تک کہ جب اس آیت ﴿فَكَيْفَ إِذَا جِئْنَا مِنْ كُلِّ أُمَّةٍ بِشَهِيدٍ وَجِئْنَا بِكَ عَلَى هَؤُلَاءِ شَهِيدًا﴾ [سورة النساء: 41] پر پہنچے تو رسول اللہ صلی اللہ علیہ وسلم زار و قطار رونے لگے اور عبد اللہ تلاوت سے رک گئے، پھر رسول اللہ صلی اللہ علیہ وسلم نے ان سے فرمایا: ”کچھ گفتگو کرو“، تو انہوں نے اللہ کی حمد و ثنا بیان کی، نبی کریم صلی اللہ علیہ وسلم پر درود بھیجا اور حق کی گواہی دیتے ہوئے کہا: «رَضِينَا بِاللّٰهِ رَبًّا، وَبِالْإِسْلَامِ دِينًا» ”ہم اللہ کے رب ہونے اور اسلام کے دین ہونے پر راضی ہیں، اور میں تمہارے لیے اسی بات پر راضی ہوں جس پر اللہ اور اس کے رسول راضی ہوئے“، تو رسول اللہ صلی اللہ علیہ وسلم نے ارشاد فرمایا: ”میں تمہارے لیے اسی بات پر راضی ہوں جس پر ابنِ امِ عبد تمہارے لیے راضی ہوئے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5480]

اعمش بیان کرتے ہیں کہ شقیق (ابو وائل) نبی کریم صلی اللہ علیہ وسلم کے صحابہ کا تذکرہ کر رہے تھے مگر انہوں نے ابنِ مسعود کا ذکر نہیں کیا، میں نے ان سے کہا: میں دیکھ رہا ہوں کہ آپ ابنِ مسعود کا تذکرہ نہیں کر رہے؟! انہوں نے جواب دیا: ”وہ ایسی شخصیت ہیں جن پر میں کسی کو فضیلت نہیں دیتا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5481]

علقمہ بیان کرتے ہیں کہ سیدنا عبد اللہ بن مسعود رضی اللہ عنہ اپنی عادات و اطوار، طور طریقوں اور چال ڈھال میں نبی کریم صلی اللہ علیہ وسلم کے مشابہ تھے، اور ابراہیم نخعی فرماتے ہیں کہ علقمہ خود عبد اللہ بن مسعود کے مشابہ تھے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5482]