سیدنا علی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر میں کسی کو بغیر مشورہ کے تمہارا خلیفہ بناتا تو ابن ام عبد کو بناتا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5475]

سیدنا عمر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص اسی انداز میں قرآن پڑھنا چاہتا ہو جس انداز میں نازل ہوا تو وہ ابن ام معبد کی قراءت پڑھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5476]

سیدنا زید بن وہب فرماتے ہیں: میں سیدنا عمر رضی اللہ عنہ کے پاس بیٹھا ہوا تھا کہ ایک کمزور شخص ان کے پاس آیا، آپ ان کی جانب دیکھنے لگے اور ان کا چہره (فرط مسرت سے) چمکنے لگا، پھر فرمایا: یہ شخص علم سے کیسے بھرپور ہے، یہ شخص علم سے کیسے بھرپور ہے۔ (آپ کی مراد) سیدنا عبداللہ بن مسعود رضی اللہ عنہ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5477]

سیدنا علی رضی اللہ عنہ فرماتے ہیں: ان سے کہا گیا کہ رسول اللہ صلی اللہ علیہ وسلم کے صحابہ کے بارے میں کچھ بتائیں۔ آپ نے دریافت کیا: کس کے بارے میں بتاؤں؟ لوگوں نے کہا: سیدنا عبداللہ بن مسعود رضی اللہ عنہ کے بارے میں۔ سیدنا علی رضی اللہ عنہ نے فرمایا: انہوں نے کتاب و سنت کا علم سیکھا اور اسی پر انتہاء کر دی اور یہ ان کو کافی ہو گیا۔ اس کے بعد پوری حدیث بیان کی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5478]