عباس بن عبدالمطلب رضی اللہ عنہ فرماتے ہیں: میں ایک دن مسجد میں بیٹھا ہوا تھا، ابوجہل آیا اور کہنے لگا: مجھے اللہ کی قسم ہے اگر میں نے محمد کو دیکھ لیا تو اس کی گردن لتاڑوں گا۔ میں فوراً رسول اللہ صلی اللہ علیہ وسلم کے پاس گیا اور آپ صلی اللہ علیہ وسلم کو ابوجہل کی بات بتائی۔ پھر ابوجہل غصے کے عالم میں مسجد میں آ گیا، وہ اتنی جلدی میں تھا کہ دروازے میں سے گزرنے کی بجائے دیوار پھاند کر اندر آیا، میں نے کہا: آج تو بڑی آزمائش کا دن ہے۔ میں بھی اس کے پیچھے پیچھے آ گیا۔ پھر رسول اللہ صلی اللہ علیہ وسلم یہ آیات پڑھتے ہوئے مسجد میں تشریف لائے: اقْرَأْ بِاسْمِ رَبِّكَ الَّذِي خَلَقَ خَلَقَ الْإِنْسَانَ مِنْ عَلَقٍ (العلق: 1، 2) ”پڑھو اپنے رب کے نام سے جس نے پیدا کیا آدمی کو خون کی پھٹک سے بنایا“ اور جب آپ ابوجہل کے متعلق نازل ہونے والی ان آیات پر پہنچے {كَلَّا إِنَّ الْإِنْسَانَ لَيَطْغَى أَنْ رَآهُ اسْتَغْنَى} (العلق: 6۔ 7) ”ہاں ہاں بے شک آدمی سرکشی کرتا ہے اس پر کہ اپنے آپ کو غنی سمجھ لیا“ ایک آدمی نے ابوجہل کو کہا: اے ابوالحکم! یہ ہیں محمد رسول الله صلی اللہ علیہ وسلم (اب کر لو جو کچھ دعوے کر رہا تھا) ابوجہل نے کہا: جو کچھ مجھے نظر آ رہا ہے کیا تم وہ سب نہیں دیکھ رہے ہو، خدا کی قسم! آسمان مجھ پر گرنے والا ہے۔ پھر جب رسول الله صلی اللہ علیہ وسلم اس سورت کے آخر تک پہنچے تو سجدہ کیا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5500]