سیدنا علی رضی اللہ عنہ فرماتے ہیں: سیدنا عباس بن عبدالمطلب رضی اللہ عنہ نے رسول اللہ صلی اللہ علیہ وسلم سے صدقہ کا مال کھولنے سے پہلے، لینے کی درخواست کی، تو رسول الله صلی اللہ علیہ وسلم نے ان کو اجازت دے دی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5520]

سیدنا مطلب بن ربیعہ فرماتے ہیں: سیدنا عباس رضی اللہ عنہ پریشان حالت میں رسول اللہ صلی اللہ علیہ وسلم کی بارگاہ میں آئے، رسول الله صلی اللہ علیہ وسلم نے پریشانی کی وجہ پوچھی، انہوں نے کہا: یا رسول اللہ صلی اللہ علیہ وسلم ہمیں اور قریش کو کیا مسئلہ ہے؟ رسول الله صلی اللہ علیہ وسلم نے پوچھا: تمہیں اور انہیں کیا مسئلہ ہے؟ انہوں نے کہا: یہ ایک دوسرے کے ساتھ تو بہت خندہ پیشانی سے ملتے ہیں لیکن جب یہ لوگ ہم سے ملتے ہیں تو ان کے انداز درست نہیں ہوتے۔ راوی کہتے ہیں: یہ بات سن کر رسول الله صلی اللہ علیہ وسلم کو غصہ آیا حتی کہ غصہ کی وجہ سے آپ کی پیشانی پر پسینہ آ گیا، جب آپ کی وہ کیفیت ختم ہوئی تو آپ صلی اللہ علیہ وسلم نے فرمایا: اس ذات کی قسم! جس کے قبضہ قدرت میں محمد کی جان ہے کسی شخص کے دل میں اس وقت تک ایمان داخل نہیں ہوتا جب تک کہ وہ اللہ اور اس کے رسول کی خاطر تم سے محبت نہ رکھے، پھر فرمایا: ان لوگوں کا کیا حال ہو گا جو عباس کے بارے میں مجھے تکلیف دیتے ہیں۔ کسی آدمی کا چچا اس کے باپ کی طرح ہوتا ہے۔ ٭٭ اس حدیث کو اسماعیل بن ابی خالد نے یزید بن ابی زیاد اور یزید سے روایت کیا ہے لیکن شیخین رحمۃ اللہ علیہما نے اس کو نقل نہیں کیا۔ یہ بھی کوفیین کی حدیث کے ارکان میں سے ایک رکن ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5521]

سیدنا عباس بن عبدالمطلب رضی اللہ عنہ فرماتے ہیں: میں نے عرض کی: یا رسول اللہ صلی اللہ علیہ وسلم قریش لوگ جب ایک دوسرے سے ملتے ہیں تو بہت گرم جوشی کے ساتھ ملتے ہیں لیکن جب وہ ہم سے ملتے ہیں تو بہت بے رخی سے ملتے ہیں۔ اس بات سے رسول اللہ صلی اللہ علیہ وسلم بہت غضبناک ہوئے اور فرمایا: اس ذات کی قسم جس کے قبضہ میں محمد کی جان ہے کسی انسان کے دل میں اس وقت تک ایمان داخل نہیں ہو سکتا جب تک وہ الله اور اس کے رسول کی رضا کی خاطر تم سے محبت نہ کرے گا۔ ٭٭ میں نے اس حدیث کا کچھ حصہ سیدنا حسن اور سیدنا حسین رضی اللہ عنہما کے فضائل میں اور رسول اللہ صلی اللہ علیہ وسلم کے اہل بیت کے فضائل کے ابواب میں بیان کر دیا ہے اور مطلب بن ربیعہ کا ذکر کرتے ہوئے اس کی علت بھی بیان کر دی تھی، اور جس نے اس اسناد میں ان کو ساقط کر دیا اس کو اس موقع پر اس حدیث کے اعادہ کی حاجت نہیں ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5522]

سیدنا سعید بن مسیب رضی اللہ عنہ سیدنا عباس بن عبدالمطلب رضی اللہ عنہ کے بارے میں فرماتے ہیں: وہ اس امت کے سب سے بہترین شخص ہیں، رسول اللہ صلی اللہ علیہ وسلم کے وارث ہیں اور ان کے چچا ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5523]

ابوصالح ذکوان فرماتے ہیں: سیدنا عباس بن عبدالمطلب رضی اللہ عنہ نے مجھے سیدنا عثمان رضی اللہ عنہ کی طرف بھیجا۔ میں ان کے پاس آیا وہ لوگوں کو ناشتہ کروا رہے تھے، میں نے ان کو دعوت دی، سیدنا عثمان رضی اللہ عنہ، سیدنا عباس رضی اللہ عنہ کے پاس چلے آئے، اور کہا: اے ابوالفضل! چہرے کامیاب ہو گئے، انہوں نے کہا: اور اے امیرالمومنین آپ کا چہرہ؟ انہوں نے کہا: میں سے اس سے زیادہ کوتاہی نہیں کی کہ جب آپ کا قاصد میرے پاس آیا تو میں لوگوں کو ناشتہ کروا رہا تھا، وہاں سے فارغ ہوتے ہی میں آپ کے پاس آ گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5524]

سیدنا عمرو بن ثابت رضی اللہ عنہ فرماتے ہیں: ایک شخص سیدنا حسین بن علی رضی اللہ عنہ کے پاس آیا، اس وقت سیدنا حسین کھانا کھا رہے تھے، آپ نے اس کو بھی کھانے میں شامل ہونے کی دعوت دی، اس نے کہا: میں کھا چکا ہوں، آپ پوچھا کس کے پاس؟ اس نے کہا: سیدنا عبدالله بن عباس رضی اللہ عنہما کے پاس۔ آپ نے فرمایا: کیوں نہیں ان کے والد قریش کے سردار ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5525]