ابوالاشعث سیدنا عبادہ بن صامت رضی اللہ عنہ سے روایت کرتے ہیں، انہوں نے کہا: ہم نے رسول اللہ صلی اللہ علیہ وسلم کے ہاتھ پر اس بات کی بیعت کی تھی کہ ہم اللہ کے معاملے میں کسی ملامت کرنے والے کی ملامت سے نہیں ڈریں گے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5624]

جنادہ بن ابی امیہ سیدنا عبادہ بن صامت رضی اللہ عنہ سے روایت کرتے ہیں، انہوں نے کہا: رسول اللہ صلی اللہ علیہ وسلم جب (دیگر امور میں) مشغول ہوتے اور کوئی شخص اسلام قبول کر کے آتا تو آپ صلی اللہ علیہ وسلم اسے ہم میں سے کسی شخص کے حوالے کر دیتے تاکہ وہ اسے قرآن مجید سکھائے۔ چنانچہ رسول اللہ صلی اللہ علیہ وسلم نے ایک شخص کو میرے حوالے کیا جو میرے ساتھ گھر میں ہی رہتا تھا، اور میں اسے قرآن پڑھاتا تھا۔ اس نے یہ سمجھا کہ میرا اس پر کوئی حق (احسان) ہے، چنانچہ اس نے مجھے ایک کمان ہدیہ کی، میں نے اس سے زیادہ عمدہ اور بہترین لچک والی کمان کبھی نہیں دیکھی تھی۔ میں رسول اللہ صلی اللہ علیہ وسلم کی خدمت میں حاضر ہوا اور عرض کیا: ”اے اللہ کے رسول! آپ اس (کمان) کے بارے میں کیا فرماتے ہیں؟“ آپ صلی اللہ علیہ وسلم نے فرمایا: ”یہ تمہارے دونوں کندھوں کے درمیان (آگ کا) ایک انگارہ ہے جسے تم نے لٹکا لیا ہے، یا اپنے گلے میں پہن لیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5625]