سیدنا عبادہ بن صامت رضی اللہ عنہ فرماتے ہیں کہ رسول اللہ صلی اللہ علیہ وسلم کی مصروفیات بہت زیادہ ہوتی تھیں اس لئے جب کوئی شخص آ کر رسول اللہ صلی اللہ علیہ وسلم کے ہاتھ پر اسلام قبول کرتا تو آپ صلی اللہ علیہ وسلم اس کو ہم میں سے کسی ایک کے پاس بھیج دیتے، تاکہ ہم اس کو قرآن پاک سکھائیں، اسی طرح ایک آدمی کو رسول اللہ صلی اللہ علیہ وسلم نے میرے پاس بھیجا، میں اس کو قرآن کریم سکھاتا رہا، اس بناء پر وہ سمجھتا تھا کہ میرا اس پر کوئی حق ہے چنانچہ اس نے مجھے ایک کمان تحفہ میں دی، میں نے اس سے زیادہ اچھی کمان کبھی نہیں دیکھی۔ میں وہ کمان رسول اللہ صلی اللہ علیہ وسلم کی بارگاہ میں لے کر آیا، میں نے پوچھا: یا رسول اللہ صلی اللہ علیہ وسلم اس میں کیا کمال ہے؟ آپ صلی اللہ علیہ وسلم نے فرمایا: یہ تو ایک انگارہ ہے جو تم دو کندھوں کے درمیان لٹکائے ہوئے ہو۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5625]

سیدنا عثمان بن عفان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میرے بعد تم پر ایسے حکمران مسلط ہوں گے جو تمہیں ایسی چیزیں بتائیں گے جن کا تم انکار کرتے ہو اور ایسی چیزوں کا انکار کریں گے جن کو تم خوب پہچانتے ہو، تم میں سے جو شخص ان کو پائے تو اللہ تعالیٰ کے نافرمان کی اطاعت کرنا تم پر واجب نہیں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اسی حدیث کو زہیر بن معاویہ اور مسلم بن خالد زنجی نے اسماعیل بن عبید بن رفاعہ کے واسطے سے عبداللہ بن عثمان بن خثیم سے روایت کیا ہے البتہ اس میں کچھ اضافہ ہے۔ زہیر کی روایت کردہ حدیث یہ ہے [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5626]

زہیر نے اسماعیل بن عبید کے حوالے سے اسی طرح کی حدیث نقل کی ہے۔ وَاَمَّا حَدِیْثُ مُسْلِمِ بْنِ خَالِدٍ اور مسلم بن خالد کی روایت کردہ حدیث درج ذیل ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5627]

مسلم بن خالد نے اسماعیل بن عبید بن رفاعہ سے، انہوں نے اپنے والد سے روایت کیا ہے کہ سیدنا عبادہ بن صامت رضی اللہ عنہ، امیرالمومنین سیدنا عثمان بن عفان رضی اللہ عنہ کی حویلی کے درمیان کھڑے ہوئے اور فرمایا: میں نے ابوالقاسم محمد صلی اللہ علیہ وسلم کو یہ فرماتے ہوئے سنا ہے کہ عنقریب میرے بعد تمہارے امور کے ایسے لوگ ذمہ دار بن جائیں گے جو تمہیں ایسی باتیں سمجھانے کی کوشش کریں گے جو تم جانتے ہی نہیں ہو اور تم پر ایسی چیزوں کا انکار کریں گے جن کو تم پہچانتے ہو، اس لئے جو شخص اللہ تعالیٰ کی نافرمانی کرے، تم پر اس کی اطاعت لازم نہیں ہے۔ تم اپنے آپ کو (ان کی اطاعت میں) تھکا نہ دینا۔ اس ذات کی قسم! جس کے قبضہ قدرت میں میری جان ہے کہ بیشک معاویہ رضی اللہ عنہ انہیں میں سے ہے۔ سیدنا عثمان رضی اللہ عنہ نے ان کے کسی ایک بھی حرف کی پکڑ نہیں کی۔ ٭٭ یہی حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح اسناد کے ہمراہ بھی مروی ہے اس میں سیدنا عبادہ بن صامت رضی اللہ عنہ کے سیدنا عثمان بن عفان رضی اللہ عنہ کے گھر میں مظلوم بن کر آنے کا ذکر موجود ہے اور اس کا متن مذکورہ حدیث سے مختصر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5628]