سیدنا ابوہریرہ رضی اللہ عنہ سے روایت ہے کہ جب جنگ کے بادل چھٹے تو رسول اللہ صلی اللہ علیہ وسلم نے (اللہ کے فضل پر) اظہارِ افتخار فرمایا جبکہ سیدنا طلحہ رضی اللہ عنہ اور سماک بن خرشہ یعنی ابو دجانہ رضی اللہ عنہ دونوں بالکل خاموش رہے، تب رسول اللہ صلی اللہ علیہ وسلم نے فرمایا: ”بلاشبہ میں نے احد کے دن خود کو اس حالت میں دیکھا کہ روئے زمین پر میرے قریب کوئی مخلوق نہیں تھی سوائے جبریل (علیہ السلام) کے جو میری دائیں جانب تھے اور طلحہ (رضی اللہ عنہ) میری بائیں جانب تھے“، اس بارے میں یہ اشعار کہے گئے: ”اور طلحہ نے احد کی گھاٹی والے دن محمد صلی اللہ علیہ وسلم کی غمخواری کی، ایسے وقت میں جب حالات ان پر سخت اور تنگ ہو گئے تھے، انہوں نے اپنے دونوں ہاتھوں سے نیزوں کے سامنے آپ صلی اللہ علیہ وسلم کا دفاع کیا یہاں تک کہ ان کی انگلیاں نیزوں تلے کٹ کر شل ہو گئیں، اور وہ محمد صلی اللہ علیہ وسلم کے بعد لوگوں کے پیشوا تھے جنہوں نے اسلام کی چکی کو اس کے مستقر ہونے تک (اپنے ثبات سے) برقرار رکھا“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5716]

سفیان بن عیینہ سے روایت ہے کہ حسان بن ثابت رضی اللہ عنہ نے سیدنا طلحہ رضی اللہ عنہ کی شان میں یہ اشعار کہے اور انہوں نے (مدح میں) کسی کو مستثنیٰ نہیں کیا: ”وہ اس وقت ثابت قدم رہے جب نبی کریم صلی اللہ علیہ وسلم (دشمن کے نرغے میں) گھر گئے تھے اور جب تمام لوگ پیٹھ پھیر کر منتشر ہو چکے تھے، وہ نبی کریم صلی اللہ علیہ وسلم کی جانِ اطہر کا دفاع کر رہے تھے جبکہ دشمن آپ صلی اللہ علیہ وسلم کے بالکل قریب پہنچ چکا تھا اور پے در پے حملے کر رہا تھا، ان کا جسم خون میں لت پت تھا اس خوف سے کہ اگر دشمن یہ کہہ کر پلٹ آیا کہ ہم نے اپنا بدلہ لینا ہے تو وہ دوبارہ ان پر ٹوٹ پڑیں گے“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5717]

ام اسحاق بنت طلحہ سے روایت ہے کہ میں نے اپنے والد کو یہ کہتے ہوئے سنا: ”احد کے دن میرا پورا جسم زخمی ہو گیا تھا یہاں تک کہ میرے مخصوص عضو پر بھی زخم آئے تھے“۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5718]