سعدی بنت عوف المریہ کہتی ہیں: میرے پاس سیدنا طلحہ رضی اللہ عنہ تشریف لائے، آپ بہت پریشان نظر آ رہے تھے، میں نے کہا: کیا وجہ ہے آج آپ کا چہرہ غمناک کیوں دکھائی دے رہا ہے؟ کیا ہمارے معاملات میں سے کسی میں تمہیں شک واقع ہو رہا ہے؟ انہوں نے کہا: جی نہیں، مجھے تمہارے کسی معاملہ میں شک نہیں ہے۔ اور آپ تو اچھی ساتھی ہو، (اصل بات یہ ہے کہ) میرے پاس کچھ جمع شدہ مال ہے، انہوں نے کہا: تم وہ اپنے گھر والوں اور اپنے خاندان والوں کے لئے بھیج دو اور ان میں تقسیم کرا دو، سعدی بنت عوف المریہ کہتی ہیں: انہوں نے ایسا ہی کیا، بعد میں، میں نے ان کے خازن سے پوچھا کہ جو مال تقسیم کیا گیا، وہ کتنا تھا؟ انہوں نے کہا: چار لاکھ۔ ان کی روزانہ کی آمدن ہزار درہم تھی۔ اور سیدنا طلحہ کو ” فیاض “ کے نام سے پکارا جاتا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5715]

سیدنا ابوہریرہ رضی اللہ عنہ فرماتے ہیں: جب جنگ ختم ہو گئی تو رسول اللہ صلی اللہ علیہ وسلم نے اس پر فخر کیا، اس وقت سیدنا طلحہ رضی اللہ عنہ خاموش تھے، سیدنا ابودجانہ سماک بن حرب رضی اللہ عنہ بھی بالکل خاموش تھے، تو رسول اللہ صلی اللہ علیہ وسلم نے فرمایا: میں نے جنگ احمد میں دیکھا ہے کہ پوری روئے زمین میں اللہ کی مخلوقات میں سے کوئی بھی میرے قریب نہ تھا سوائے سیدنا جبریل امین علیہ السلام کے، کہ وہ میرے دائیں جانب تھے، اور طلحہ میرے بائیں جانب تھے۔ درج ذیل شعر اسی سلسلہ میں ہے۔ اور جنگ احد کے دن سیدنا طلحہ رضی اللہ عنہ نے انتہائی پریشانی اور سختی میں حضور صلی اللہ علیہ وسلم کے ساتھ تعاون کیا۔ انہوں نے آتے ہوئے تیروں سے رسول اللہ صلی اللہ علیہ وسلم کا دفاع کیا اور تیروں کی وجہ سے آپ کے ہاتھ کی انگلیاں شل ہو گئیں۔ وہ محمد صلی اللہ علیہ وسلم کے بعد لوگوں کے امام ہیں، انہوں نے اسلام کی چکی کو چلائے رکھا حتیٰ کہ وہ مضبوط ہو گئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5716]

سیدنا حسان بن ثابت رضی اللہ عنہ نے سیدنا طلحہ رضی اللہ عنہ کے بارے میں فرمایا: * جنگ احد کے موقع پر جب نبی اکرم صلی اللہ علیہ وسلم کے پاس سے تمام لوگ بھاگ چکے تھے آپ اس نازک وقت میں بھی حضور صلی اللہ علیہ وسلم کے ساتھ ثابت قدم رہے۔ * وہ رسول اللہ صلی اللہ علیہ وسلم کا دفاع کرتے رہے حالانکہ دشمن آپ صلی اللہ علیہ وسلم کے بالکل قریب تھا۔ اور آپ پر چڑھ دوڑا تھا۔ * ان کے جسم کا اکثر حصہ خون سے لتھڑا ہوا تھا اس بات کے ڈر سے کہ کہیں لوگ یہ باتیں نہ کریں کہ ان کے جذبات ٹھنڈے پڑ گئے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5717]