سیدنا جابر رضی اللہ عنہ فرماتے ہیں کہ سیدنا عمار بن یاسر رضی اللہ عنہ اور ان کے اہل و عیال کو تکالیف دی جاتی تھیں، تو رسول اللہ صلی اللہ علیہ وسلم نے ان سے فرمایا: اسے آل عمار! اے آل یاسر تمہیں خوشخبری ہو کہ تم سے جنت کا وعدہ کر لیا گیا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5770]

سیدنا خالد بن ولید رضی اللہ عنہ فرماتے ہیں: میرے اور عمار کے درمیان کچھ ناراضگی سی چل رہی تھی میں نے رسول اللہ صلی اللہ علیہ وسلم کی بارگاہ میں اس کی شکایت کر دی، تو رسول اللہ صلی اللہ علیہ وسلم نے فرمایا: جو عمار رضی اللہ عنہ کو گالی دے، اللہ اس کو گالی کا بدلہ دیتا ہے، جو عمار سے دشمنی کرے، اللہ تعالیٰ اس سے دشمنی کرتا ہے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5771]

ابراہیم بن سعد اپنے والد سے، وہ ان کے دادا سے روایت کرتے ہیں کہ میں نے سیدنا عمار بن یاسر رضی اللہ عنہ کو جنگ صفین جس میں آپ کی شہادت واقع ہوئی یہ ندا دیتے ہوئے سنا ” آج جنت کو سجا دیا گیا ہے اور حورعین سے نکاح کرا دیا گیا ہے، ہم اپنے حبیب محمد صلی اللہ علیہ وسلم سے ملاقات کرنے والے ہیں، جنہوں نے مجھے بتایا تھا کہ اس دنیا میں میرا آخری طعام پانی ملا ہوا دودھ ہو گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق ہے لیکن ان دونوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5772]