عروہ کہتے ہیں: جب رسول اللہ صلی اللہ علیہ وسلم جنگ بدر کے لئے سفر میں تھے، اس سفر کے دوران مقام روحاء میں آپ علیہ السلام کی ملاقات ایک دیہاتی کے ساتھ ہوئی، صحابہ کرام نے اس سے اہل مکہ کے حالات پوچھے، لیکن اس کو کچھ خبر نہ تھی، صحابہ کرام نے اس کو مشورہ دیا کہ تم حضور صلی اللہ علیہ وسلم کی بارگاہ میں سلام عرض کر لو، اس نے پوچھا: کیا تمہارے اندر رسول اللہ صلی اللہ علیہ وسلم موجود ہیں؟ صحابہ کرام رضی اللہ عنہم نے کہا: جی ہاں۔ اس نے (رسول اللہ صلی اللہ علیہ وسلم سے) کہا: اگر آپ نبی ہیں تو بتائیے کہ میری اونٹنی کے پیٹ میں کیا (نر ہے یا مادہ) ہے؟ سیدنا سلمہ بن سلامہ رضی اللہ عنہ نوجوان صحابی تھے انہوں نے اس دیہاتی سے کہا: تو (میرے نبی کا امتحان لینا چاہتا ہے؟) رسول اللہ صلی اللہ علیہ وسلم سے مت پوچھ، (ادھر آ) اس بات کا جواب میں تجھے دیتا ہوں۔ اس کو تو نے گابھن کیا اور اس کے پیٹ میں تیرا بچہ ہے۔ (یہ بات سن کر) رسول اللہ صلی اللہ علیہ وسلم نے فرمایا: اے سلمہ! تو نے اس آدمی کے ساتھ فحش کلامی کی ہے۔ پھر رسول اللہ صلی اللہ علیہ وسلم نے اس آدمی سے منہ پھیر لیا اور اس سے کوئی بات چیت نہ کی۔ قافلہ وہاں سے روانہ ہوا تو مقام روحاء میں مسلمانوں نے ان کا والہانہ استقبال کیا اور ان کو مبارک باد پیش کی۔ سیدنا سلمہ بن سلامہ رضی اللہ عنہ نے عرض کی: یا رسول اللہ صلی اللہ علیہ وسلم ! یہ لوگ کس بات کی مبارک بادیاں دے رہے ہیں؟ خدا کی قسم ہم نے تو صرف ان کے بوڑھے لاچار و کمزور لوگوں کو قتل کیا ہے جیسا کہ باندھے ہوئے اونٹوں کو نحر کیا ہو رسول اللہ صلی اللہ علیہ وسلم نے فرمایا: ہر قوم میں سمجھداری پائی جاتی ہے، اور اس کو صرف اس کے قوم کے شرفاء ہی جانتے ہیں۔ ٭٭ یہ حدیث اگرچہ مرسل ہے لیکن صحیح الاسناد ہے، اس حدیث میں سیدنا سلمہ بن سلامہ رضی اللہ عنہ کے فضائل موجود ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5876]

سیدنا عروہ کہتے ہیں: سیدنا عاصم بن عدی بن جد بن عجلان جنگ بدر کے لئے روانہ ہوئے تھے، لیکن رسول اللہ صلی اللہ علیہ وسلم نے ان کو واپس دیا تھا البتہ بدری صحابہ کے برابر ان کا حصہ رکھا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5877]

ابن اسحاق کہتے ہیں: عاصم بن عدی بن جد بن عجلان بن حارثہ بن ضبیعہ کا تعلق قبیلہ ” بکیّ “ سے ہے۔ یہ ” بنی عبد بن زید بن مالک بن عوف بن عمرو بن عوف بن مالک بن اوس “ کے حلیف ہیں۔ یہ جنگ بدر کے لئے روانہ ہوئے تھے۔ لیکن رسول اللہ صلی اللہ علیہ وسلم نے ان کو واپس بھیج دیا تھا جبکہ ان کے لئے بدر کا حصہ رکھا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5878]