محمد بن عمر نے ان کا نصب یوں بیان کیا ہے ” عاصم بن عدی بن جد بن عجلان بن حارثہ بن ضبیعہ بن حرام بن جعل بن عمرو بن خثیم بن ودم بن ذبیان بن ہمیم بن ہتم بن علی بن عمرو بن حاف بن قضاعہ۔“ ان کی کنیت ” ابوعمرو “ تھی، اور بعض مؤرخین نے ان کی کنیت ” ابوعبداللہ “ بیان کی ہے۔ عاصم بن عدی رضی اللہ عنہ فرماتے ہیں کہ جب رسول اللہ صلی اللہ علیہ وسلم بدر کی جانب روانہ ہوئے تو بعض مشتبہ خبریں موصول ہونے کی وجہ سے احتیاطاً عاصم بن عدی کو اہل قباء اور اہل عالیہ پر اپنا نائب مقرر فرمایا۔ ان کے لئے بدر کا حصہ بھی اور ثواب بھی رکھا، اس لئے سیدنا عاصم بن عدی رضی اللہ عنہ بدری صحابہ میں سے ہیں۔ ابن عمر کہتے ہیں: سیدنا عاصم بن عدی رضی اللہ عنہ جنگ احد، جنگ خندق اور تمام غزوات میں رسول اللہ صلی اللہ علیہ وسلم کے ہمراہ شریک ہوئے۔ سیدنا عاصم کا قد درمیانہ تھا۔ 115 سال کی عمر میں سیدنا معاویہ رضی اللہ عنہ کے دور حکومت میں سن 45 ہجری کو فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5879]

عاصم بن عدی رضی اللہ عنہ سے روایت ہے کہ: ”جب رسول اللہ صلی اللہ علیہ وسلم نے (غزوہ) بدر کے لیے نکلنے کا ارادہ فرمایا، تو عاصم بن عدی کو قباء اور اہل عالیہ (مدینہ کا بالائی حصہ) پر اپنا نائب مقرر فرمایا، کیونکہ آپ صلی اللہ علیہ وسلم کو ان کے بارے میں کوئی اطلاع ملی تھی۔ چنانچہ رسول اللہ صلی اللہ علیہ وسلم نے (مالِ غنیمت میں) ان کا حصہ بھی مقرر فرمایا اور انہیں (جہاد کا) اجر بھی ملا“۔ پس ان کا شمار ان لوگوں میں ہوتا ہے جو غزوہ بدر میں شریک تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5880]

ابن عمر (الواقدی) بیان کرتے ہیں کہ: عاصم بن عدی (رضی اللہ عنہ) غزوہ احد، خندق اور رسول اللہ صلی اللہ علیہ وسلم کے ہمراہ تمام غزوات میں شریک رہے۔ عاصم پست قامت (مختصر قد) کے مالک تھے، اور ان کی وفات امیر معاویہ (رضی اللہ عنہ) کی خلافت کے دوران سن 45 ہجری میں ہوئی جبکہ ان کی عمر ایک سو پندرہ (115) برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5880M]

عاصم بن ابی بداح بن عاصم بن عدی اپنے والد سے، وہ ان کے دادا سے روایت کرتے ہیں کہ میں نے اور میرے بھائی نے جنگ حنین کے حصص میں سے ایک سو حصص خریدے۔ یہ بات رسول اللہ صلی اللہ علیہ وسلم تک پہنچ گئی، آپ صلی اللہ علیہ وسلم نے فرمایا: اے عاصم! دو بھوکے بھیڑئیے بکریوں کے ریوڑ میں گھس کر اتنا فساد نہیں کرتے جتنا فساد مال اور منصب کی محبت کروا دیتی ہے۔ سیدنا عاصم بن عدی رضی اللہ عنہ کی رسول اللہ صلی اللہ علیہ وسلم سے روایت کردہ مشہور حدیث یہ ہے: [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5881]

ابوبداح بن عاصم بن عدی اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے اونٹوں کے چرواہوں کے لئے یہ رخصت عنایت فرمائی ہے کہ وہ نحر کے دن، پھر اگلے دن، پھر اس سے اگلے دن رمی کر سکتے ہیں۔ ٭٭ یہ حدیث صحیح الاسناد ہے، مالک بن انس نے اس اسناد کو عمدہ قرار دیا ہے جبکہ دیگر محدثین نے اس کو پسند نہیں کیا۔ اور امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5882]

ابوبداح بن عاصم بن عدی اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے غلہ بانوں کے لئے اس بات کی رخصت عنایت فرمائی ہے کہ وہ ایک دن رمی کریں اور ایک دن ناغہ کریں۔ ٭٭ یحیی کہتے ہیں: یہ غلط ہے، جیسا کہ مالک نے کہا: یحیی فرماتے ہیں: سفیان جب ہمیں یہ حدیث بیان کیا کرتے تھے تو کہا کرتے تھے: اس حدیث میں سے کچھ کچھ مجھے بھول گیا ہے۔ امام حاکم کہتے ہیں: ابوبداح بن عاصم بن عدی نے اپنے والد کے حوالے سے اس حدیث کو مسند بھی کیا ہے، جیسا کہ درج ذیل ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5883]