صفوان بن عبداللہ اپنے دونوں چچاؤں سیدنا یعلی اور سیدنا سلمہ رضی اللہ عنہما (پسرانِ امیہ) سے روایت کرتے ہیں کہ ہم رسول اللہ صلی اللہ علیہ وسلم کے ہمراہ غزوہ تبوک میں نکلے، ہمارے ساتھ ہمارا ایک ساتھی تھا جس کا ایک شخص سے جھگڑا ہو گیا تو اس نے میرے ساتھی کے بازو پر دانتوں سے کاٹ لیا، میرے ساتھی نے اپنا بازو اس کے منہ سے زور سے کھینچا تو کاٹنے والے کے سامنے کے دو دانت ٹوٹ کر گر گئے، وہ شخص رسول اللہ صلی اللہ علیہ وسلم کی خدمت میں دیت (خون بہا) مانگنے پہنچا تو آپ صلی اللہ علیہ وسلم نے فرمایا: ”تم میں سے کوئی اپنے بھائی کے پاس جاتا ہے اور اسے اس طرح کاٹتا ہے جیسے سانڈ کاٹتا ہے، اور پھر اس کے بعد دیت مانگنے آ جاتا ہے؟! جاؤ، تمہارے لیے کوئی دیت نہیں ہے“، چنانچہ رسول اللہ صلی اللہ علیہ وسلم نے اس مطالبے کو کالعدم قرار دے دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5907]