مصعب بن عبداللہ زبیری سے مروی ہے کہ بنو جشم بن خزرج کی شاخ بنو سلمہ سے سیدنا معاذ، معوذ اور خلاد رضی اللہ عنہم پسرانِ عمرو بن جموح بن زید بن حرام بن کعب تعلق رکھتے ہیں، آپ غزوہ بدر میں شریک ہوئے اور ابوجہل کے قتل میں حصہ لیا، اس معرکے میں عکرمہ بن ابی جہل نے آپ کا ہاتھ کاٹ دیا تھا، آپ سیدنا عثمان رضی اللہ عنہ کے دور تک بقیدِ حیات رہے، آپ کی والدہ ہند بنت عمرو بن ثعلبہ بن حرام ہیں اور آپ کے چچا سیدنا جابر بن عبداللہ انصاری رضی اللہ عنہ ہیں جو بیعتِ عقبہ اور غزوہ بدر میں شریک تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5908]

خلیفہ بن خیاط سے روایت ہے کہ سیدنا معاذ بن عمرو بن جموح رضی اللہ عنہ غزوہ بدر کے دن زخمی ہوئے تھے اور سیدنا عثمان رضی اللہ عنہ کے عہد تک مسلسل صاحبِ فراش (بیمار) رہے، پھر سن 24 ہجری میں مدینہ منورہ میں آپ کی وفات ہوئی، سیدنا عثمان بن عفان رضی اللہ عنہ نے آپ کی نمازِ جنازہ پڑھائی اور آپ کو جنت البقیع میں دفن کیا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5909]

عروہ بن زبیر سے بیعتِ عقبہ میں بنو حرام بن کعب سے رسول اللہ صلی اللہ علیہ وسلم کی بیعت کرنے والوں کے تذکرے میں مروی ہے کہ ان میں سیدنا معاذ بن عمرو بن جموح رضی اللہ عنہ بھی شامل تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5910]