محارب بن دثار سیدنا سعید بن زید رضی اللہ عنہ کے صاحبزادے سے روایت کرتے ہیں کہ حضرت معاویہ رضی اللہ عنہ نے مدینہ میں مروان بن حکم کی طرف پیغام بھیجا کہ وہ ان کے بیٹے یزید کے لیے بیعت لیں، اس وقت سیدنا سعید بن زید بن عمرو بن نفیل رضی اللہ عنہ مدینہ میں موجود نہ تھے، مروان ان کا انتظار کرنے لگا، اہل شام میں سے ایک شخص نے مروان سے کہا: آپ کو کس چیز نے روک رکھا ہے؟ مروان نے کہا: میں سعید بن زید کے آنے کا منتظر ہوں کیونکہ وہ اہل مدینہ کے بڑوں میں سے ہیں، جب وہ بیعت کریں گے تو سب لوگ بیعت کر لیں گے، راوی کہتے ہیں کہ سعید بن زید رضی اللہ عنہ نے آنے میں دیر کر دی یہاں تک کہ مروان نے (باقی لوگوں سے) بیعت لے لی جبکہ سعید رضی اللہ عنہ نے بیعت سے گریز فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5966]

سیدہ عائشہ بنت سعد بن ابی وقاص رضی اللہ عنہا بیان کرتی ہیں کہ ان کے والد سیدنا سعد رضی اللہ عنہ نے سیدنا سعید بن زید رضی اللہ عنہ کو غسل دیا اور انہیں خوشبو لگائی، پھر گھر آ کر غسل فرمایا اور کہا: ”آگاہ رہو! میں نے انہیں غسل دینے کی وجہ سے (بطورِ وجوب) غسل نہیں کیا بلکہ میں نے تپش اور گرمی کی وجہ سے غسل کیا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5967]