نفیل بن ہشام اپنے والد سے روایت کرتے ہیں کہ ان کے دادا سیدنا سعید بن زید رضی اللہ عنہ نے رسول اللہ صلی اللہ علیہ وسلم سے اپنے والد زید بن عمرو بن نفیل کے بارے میں دریافت کیا اور عرض کی: یا رسول اللہ! میرے والد زید بن عمرو ویسے ہی (موحد) تھے جیسا کہ آپ نے انہیں دیکھا اور جیسا کہ آپ تک ان کی خبر پہنچی، اگر وہ آپ کا زمانہ پا لیتے تو آپ پر ضرور ایمان لاتے، کیا میں ان کے لیے دعائے مغفرت کروں؟ آپ صلی اللہ علیہ وسلم نے فرمایا: ”ہاں، ان کے لیے مغفرت طلب کرو کیونکہ وہ قیامت کے دن تنہا ایک امت کی صورت میں اٹھائے جائیں گے“، اور لوگوں کے بیان کے مطابق وہ سچے دین کی تلاش میں تھے اور اسی جستجو میں ان کی موت واقع ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5968]

محمد بن جعفر بن زبیر سے مروی ہے کہ سیدنا عمر بن خطاب اور سیدنا سعید بن زید رضی اللہ عنہما نے عرض کی: یا رسول اللہ! کیا ہم زید بن عمرو کے لیے دعائے مغفرت کریں؟ آپ صلی اللہ علیہ وسلم نے فرمایا: ”ہاں، تم ان کے لیے مغفرت طلب کرو کیونکہ وہ تنہا ایک امت بنا کر اٹھائے جائیں گے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5969]

قیس بن ابی حازم سیدنا سعید بن زید بن عمرو بن نفیل رضی اللہ عنہ سے روایت کرتے ہیں کہ انہوں نے فرمایا: ”میں نے وہ وقت بھی دیکھا ہے جب عمر رضی اللہ عنہ نے مجھے اور میری ماں کو (یعنی میری اہلیہ کو جو عمر رضی اللہ عنہ کی بہن تھیں) اسلام لانے کی وجہ سے (سختی سے) باندھ رکھا تھا، اور اگر (دین کی خاطر پہنچنے والے مصائب پر) احد پہاڑ بھی اپنی جگہ سے ہٹ جاتا تو وہ حق بجانب ہوتا، اس کے مقابلے میں جو تم لوگوں نے عثمان رضی اللہ عنہ کے ساتھ کیا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5970]