محمد بن عمر فرماتے ہیں کہ رسول اللہ صلی اللہ علیہ وسلم نے سیدنا ابوایوب رضی اللہ عنہ کو اور سیدنا مصعب بن عمیر رضی اللہ عنہ کو ایک دوسرے کا بھائی بھائی بنایا۔ سیدنا ابوایوب رضی اللہ عنہ نے غزوہ بدر، احد، خندق اور تمام غزوات میں رسول اللہ صلی اللہ علیہ وسلم کے ہمراہ شرکت کی۔ سیدنا معاویہ کی خلافت میں ان کے بیٹے نے 52 ہجری کو قسطنطنیہ پر حملہ کیا، اس جنگ کے دوران آپ شہید ہوئے، آپ کا مزار شریف روم میں قسطنطنیہ کے قلعے کی دیوار کے ساتھ ہے۔ آپ کا مزار شریف مرجع خلائق ہے، لوگ دور دراز سے آپ کی قبر کی زیارت کے لئے آتے ہیں، اور جب بارشیں رک جائیں تو آپ کے مزار اقدس پر حاضر ہو کر دعائیں مانگتے ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6042]

محمد بن سیرین کہتے ہیں: سیدنا ابوایوب رضی اللہ عنہ جنگ بدر میں رسول اللہ صلی اللہ علیہ وسلم کے ہمراہ شریک ہوئے تھے، اور اس کے بعد بھی مسلمانوں کے کسی غزوے میں پیچھے نہیں رہے، البتہ ایک مرتبہ ایک جنگ میں ایک نوجوان کو امیر مقرر کر دیا گیا تھا، اس جنگ میں آپ شریک نہیں ہوئے تھے، لیکن اس کے بعد آپ اس میں شرکت نہ کرنے پر بہت افسوس کیا کرتے تھے اور کہا کرتے تھے کہ جس کو امیر لشکر بنایا گیا تھا مجھے اس کی امارت قبول کرنی چاہیے تھی۔ اس کے بعد آپ بیمار ہو گئے، اور لشکر کی ذمہ داری یزید بن معاویہ پر تھی، وہ ان کی زیارت کرنے کے لئے آیا، اس نے ان سے پوچھا کہ تمہاری کیا خواہش ہے؟انہوں نے کہا: جب میں مر جاؤں تو میری لاش کو سواری پر لاد کر دشمن کے علاقے میں جہاں تک لے جا سکو، لے جانا، اور اگر ایسا ممکن نہ ہو تو مجھے دفن کر دینا۔ سیدنا ابوایوب فرمایا کرتے تھے: اللہ تعالیٰ نے ارشاد فرمایا ہے: {انْفِرُوا خِفَافًا وَثِقَالًا} [التوبة: 41] اور میں اپنے آپ کو خفیف یا ثقلیل دونوں میں سے ایک پاتا ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6043]