محمد بن سیرین سے روایت ہے کہ سیدنا ابو ایوب انصاری رضی اللہ عنہ رسول اللہ صلی اللہ علیہ وسلم کے ہمراہ غزوہ بدر میں شریک ہوئے، اس کے بعد مسلمانوں کا کوئی ایسا غزوہ نہیں رہا جس میں وہ شامل نہ ہوئے ہوں سوائے ایک سال کے، جب لشکر پر ایک نوجوان کو امیر مقرر کیا گیا تو وہ اس سال پیچھے رہ گئے، پھر بعد میں اس پر افسوس کرتے اور فرماتے: ”مجھ پر جو بھی امیر مقرر کیا جائے مجھے اس سے کیا غرض، مجھ پر جو بھی امیر مقرر کیا جائے مجھے اس سے کیا غرض؟“ پھر وہ بیمار ہو گئے جبکہ لشکر کی قیادت یزید بن معاویہ کر رہے تھے، وہ ان کی عیادت کے لیے آئے اور پوچھا: ”آپ کی کیا حاجت ہے؟“ انہوں نے فرمایا: ”میری حاجت یہ ہے کہ جب میں مر جاؤں تو تم سوار ہونا، پھر دشمن کی زمین میں جہاں تک تمہیں گنجائش ملے آگے بڑھتے جانا اور جب راستہ ختم ہو جائے تو مجھے وہیں دفن کر کے واپس آ جانا۔“ راوی کہتے ہیں کہ سیدنا ابو ایوب رضی اللہ عنہ (اللہ تعالیٰ کے اس فرمان کی تلاوت کرتے ہوئے) فرمایا کرتے تھے: ﴿انفِرُوا خِفَافًا وَثِقَالًا﴾ ”نکلو ہلکے ہو یا بوجھل“ [سورة التوبة: 41] ، پس میں اپنے آپ کو یا تو ہلکا پاتا ہوں یا بوجھل۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6043]

حکم سے روایت ہے کہ سیدنا ابو ایوب انصاری رضی اللہ عنہ سیدنا علی بن ابی طالب رضی اللہ عنہ کے ہمراہ حروراء (خوارج کے خلاف جنگ) میں شریک ہوئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6044]