سیدنا شعبہ فرماتے ہیں: میں نے حکم سے کہا: سیدنا ابوایوب رضی اللہ عنہ سیدنا علی ابن ابی طالب رضی اللہ عنہ کی جنگ میں شریک ہوئے؟ انہوں نے کہا: جی ہاں، جنگ حروراء میں انہوں نے شرکت کی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6044]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم سیدنا ابوایوب رضی اللہ عنہ کے گھر ایک کمرے میں ٹھہرے ہوئے تھے، آپ کا کھانا کوٹھڑی کے اندر ایک ٹوکری میں رکھا جاتا تھا، کھڑکی سے بلی اندر آتی اور ٹوکری میں سے کھانا کھا جاتی، رسول اللہ صلی اللہ علیہ وسلم کو یہ بات بتائی گئی تو آپ صلی اللہ علیہ وسلم نے فرمایا: وہ بلی نہیں ہے، بلکہ وہ ایک چڑیل ہے، اب اگر آئے تو اس کو کہنا تجھے رسول اللہ صلی اللہ علیہ وسلم نے حکم دیا ہے کہ آئندہ ادھر نہیں آنا، راوی کہتے ہیں: وہ بلی دوبارہ آئی، سیدنا ابوایوب رضی اللہ عنہ نے اس سے کہا: تجھے رسول اللہ صلی اللہ علیہ وسلم کا حکم ہے کہ دوبارہ ادھر نہ آنا، اس نے کہا: اے ابوایوب! اب کی مرتبہ مجھے چھوڑ دو، میں دوبارہ نہیں آؤں گی۔ سیدنا ابوایوب رضی اللہ عنہ نے اس کو چھوڑ دیا اور رسول اللہ صلی اللہ علیہ وسلم کے پاس حاضر ہو کر وہ واقعہ سنایا۔ وہ بلی دو مرتبہ آئی تھی اور دونوں مرتبہ اس نے سیدنا ابوایوب رضی اللہ عنہ کو اسی طرح کہا تھا اور تیسری مرتبہ اس نے کہا: کیا آپ چاہتے ہیں کہ میں تمہیں ایسی چیز بتا دوں کہ اگر تم وہ پڑھ لو تو اس دن اور رات کوئی سرکش جن اور شیطان تمہارے گھر کے قریب نہیں آئے گا، انہوں نے کہا: جی ہاں، اس نے کہا آیۃ الکرسی یعنی اللہ لا الہ الا ھو الحی القیوم پڑھ لیا کرو، راوی کہتے ہیں، سیدنا ابوایوب رضی اللہ عنہ نے آ کر رسول اللہ صلی اللہ علیہ وسلم کو یہ بات بتائی، تو رسول اللہ صلی اللہ علیہ وسلم نے ارشاد فرمایا: وہ تھی تو جھوٹی، لیکن بات سچی بتا گئی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6045]

عبدالرحمن بن ابی عمرہ اپنے والد کا یہ بیان نقل کرتے ہیں کہ سیدنا ابوایوب انصاری رضی اللہ عنہ کی حویلی میں ایک باغیچہ تھا جس میں کھجوریں جمع ہوتی تھیں، اس کے بعد سابقہ پوری حدیث بیان کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6046]