سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم سیدنا ابو ایوب انصاری رضی اللہ عنہ کے گھر بالا خانے میں مقیم تھے، ان کا کھانا ایک الماری میں ٹوکری کے اندر رکھا ہوتا تھا، تو ایک سوراخ سے بلی جیسی کوئی چیز (جنات) آتی اور ٹوکری سے کھانا لے جاتی، انہوں نے اس کی شکایت رسول اللہ صلی اللہ علیہ وسلم سے کی تو آپ صلی اللہ علیہ وسلم نے فرمایا: ”وہ غول (جنی) ہے، جب وہ آئے تو کہنا: رسول اللہ نے تمہیں حکم دیا ہے کہ یہاں سے نہ ہلو۔“ راوی کہتے ہیں کہ جب وہ آئی تو سیدنا ابو ایوب رضی اللہ عنہ نے اس سے کہا: ”رسول اللہ صلی اللہ علیہ وسلم نے تمہیں حکم دیا ہے کہ یہاں سے نہ ہلو“، اس نے کہا: ”اے ابو ایوب! مجھے اس بار چھوڑ دیں، اللہ کی قسم! میں دوبارہ نہیں آؤں گی“، چنانچہ انہوں نے اسے چھوڑ دیا اور رسول اللہ صلی اللہ علیہ وسلم کو آ کر خبر دی، ایسا دو بار ہوا، پھر اس نے کہا: ”کیا میں تمہیں ایسے کلمات نہ سکھا دوں کہ جب تم انہیں پڑھو گے تو اس رات، اس دن اور آنے والے کل میں کوئی شیطان تمہارے گھر کے قریب نہیں آئے گا؟“ انہوں نے کہا: کیوں نہیں، اس نے کہا: ”آیت الکرسی ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [سورة البقرة: 255] پڑھ لیا کرو“، چنانچہ انہوں نے رسول اللہ صلی اللہ علیہ وسلم کی خدمت میں حاضر ہو کر خبر دی تو آپ صلی اللہ علیہ وسلم نے فرمایا: ”اس نے سچ کہا حالانکہ وہ بہت جھوٹی ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6045]

عبدالرحمن بن ابی عمرہ اپنے والد سے روایت کرتے ہیں کہ سیدنا ابو ایوب انصاری رضی اللہ عنہ کے گھر کے باغ میں کھجوریں خشک کرنے کی ایک جگہ تھی، پھر انہوں نے اسی طرح کی حدیث ذکر کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6046]

عبدالرحمن بن ابی لیلیٰ سیدنا ابو ایوب انصاری رضی اللہ عنہ سے روایت کرتے ہیں کہ ان کے پاس ایک چھوٹا کمرہ تھا جہاں وہ غول (جنی) آ کر کچھ چیزیں لے جاتی تھی، پھر انہوں نے اسی طرح کی حدیث ذکر کی۔
یہ اسانید جب جمع کی جائیں تو یہ ایک مشہور حدیث بن جاتی ہے، واللہ اعلم۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6047]