مقسم سے روایت ہے کہ سیدنا ابو ایوب انصاری رضی اللہ عنہ سیدنا معاویہ رضی اللہ عنہ کے پاس آئے اور اپنی ایک ضرورت بیان کی، انہوں نے کہا: ”کیا تم عثمان رضی اللہ عنہ کے ساتھی نہیں ہو؟“ انہوں نے جواب دیا: ”آگاہ رہو کہ رسول اللہ صلی اللہ علیہ وسلم نے ہمیں پہلے ہی خبر دے دی تھی کہ آپ صلی اللہ علیہ وسلم کے بعد ہمیں اقربا پروری اور ترجیح (حق تلفی) کا سامنا کرنا پڑے گا“، انہوں نے پوچھا: ”تو آپ صلی اللہ علیہ وسلم نے تمہیں کیا حکم دیا تھا؟“ انہوں نے کہا: ”آپ صلی اللہ علیہ وسلم نے ہمیں حکم دیا تھا کہ ہم صبر کریں یہاں تک کہ حوضِ کوثر پر آپ صلی اللہ علیہ وسلم سے جا ملیں“، سیدنا معاویہ رضی اللہ عنہ نے کہا: ”پھر صبر ہی کرو“، اس پر سیدنا ابو ایوب رضی اللہ عنہ ناراض ہو گئے اور قسم کھا لی کہ وہ ان سے کبھی بات نہیں کریں گے، پھر سیدنا ابو ایوب رضی اللہ عنہ سیدنا عبداللہ بن عباس رضی اللہ عنہما کے پاس آئے اور انہیں سارا ماجرا سنایا، تو ابن عباس ان کے لیے اپنے گھر سے اس طرح نکلے جیسے سیدنا ابو ایوب رسول اللہ صلی اللہ علیہ وسلم کے لیے اپنے گھر سے نکلے تھے، انہوں نے پوچھا: ”آپ کیا چاہتے ہیں؟“ انہوں نے کہا: ”چار غلام جو میری جگہ کام کریں“، ابن عباس رضی اللہ عنہما نے کہا: ”میرے پاس تمہارے لیے بیس غلام موجود ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6048]