عائشہ رضی اللہ عنہا کے مادری بھائی عبداللہ بن طفیل بن سخبرہ سے روایت ہے کہ انہوں نے خواب میں دیکھا کہ ان کی ملاقات عیسائیوں کی ایک جماعت سے ہوئی، انہوں نے کہا: ”تم بہت اچھے لوگ ہوتے اگر تم یہ دعویٰ نہ کرتے کہ مسیح اللہ کے بیٹے ہیں“، عیسائیوں نے جواب دیا: ”اور تم بھی بہت اچھے لوگ ہوتے اگر تم یہ نہ کہتے کہ: جو اللہ چاہے اور جو محمد صلی اللہ علیہ وسلم چاہیں“، پھر ان کی ملاقات یہودیوں کی ایک جماعت سے ہوئی تو انہوں نے کہا: ”تم بہت اچھے لوگ ہوتے اگر تم عزیر کو اللہ کا بیٹا نہ کہتے“، انہوں نے جواب دیا: ”تم بھی بہت اچھے لوگ ہوتے اگر تم یہ نہ کہتے کہ: جو اللہ چاہے اور جو محمد صلی اللہ علیہ وسلم چاہیں“، پھر وہ نبی کریم صلی اللہ علیہ وسلم کی خدمت میں حاضر ہوئے اور اپنا خواب بیان کیا، آپ صلی اللہ علیہ وسلم نے پوچھا: ”کیا تم نے یہ خواب کسی اور کو بھی سنایا ہے؟“ انہوں نے عرض کیا: جی ہاں، تب آپ صلی اللہ علیہ وسلم نے اللہ کی حمد و ثنا بیان کی اور فرمایا: ”تمہارے بھائی نے ایک خواب دیکھا ہے جو تمہیں معلوم ہو چکا ہے، اب تم یہ نہ کہا کرو کہ ”جو اللہ چاہے اور جو محمد چاہیں“ بلکہ یوں کہا کرو: ”جو اکیلا اللہ چاہے جس کا کوئی شریک نہیں“۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6058]

طفیل بن سخبرہ رضی اللہ عنہ (سیدہ عائشہ رضی اللہ عنہا کے مادری بھائی) سے روایت ہے کہ انہوں نے خواب دیکھا، پھر انہوں نے اسی طرح کی حدیث بیان کی۔
یہ روایت پہلی والی کی نسبت زیادہ محفوظ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6059]