سیدنا سعید بن مسیب رضی اللہ عنہ فرماتے ہیں: سیدنا عبدالرحمن ابن ابی بکر رضی اللہ عنہما نے اسلام میں کبھی بھی جھوٹ نہیں بولا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6123]

علقمہ بن ابی علقمہ اپنی والدہ کا یہ بیان نقل کرتے ہیں کہ ایک عورت ام المومنین سیدہ عائشہ کے گھر میں آئی، اور اس نے نبی اکرم صلی اللہ علیہ وسلم کے کمرے کے سامنے نماز پڑھی، جب اس نے نماز شروع کی تو بالکل تندرست و توانا تھی، جب وہ سجدے میں گئی تو پھر سر نہیں اٹھایا، (دیکھا تو) وہ فوت ہو چکی تھی، ام المومنین نے کہا: تمام تعریفیں اس ذات کے لئے ہیں جو زندہ رکھتی ہے اور مارتی ہے۔ اس عورت کی موت میں میرے لئے سیدنا عبدالرحمن بن ابی بکر رضی اللہ عنہما حوالے سے بہت عبرت ہے، کیونکہ وہ قیلولہ کے لئے لیٹے تھے، جب لوگ ان کو بیدار کرنے کے لئے گئے تو دیکھا کہ وہ فوت ہو چکے تھے، ام المومنین کے دل میں یہ خدشہ رہتا تھا کہ ان کے بھائی کے ساتھ شاید زیادتی ہوئی ہے اور لوگوں نے ان کو دفن کرنے میں عجلت سے کام لیا ہے اور ان کو زندہ ہی دفن کر دیا ہے۔ لیکن جب ام المومنین نے اس عورت کی اتنی اچانک موت دیکھی تو ان کے دل سے وہ خدشہ ختم ہو گیا۔ (اور ان کو یقین آ گیا کہ اتنی جلدی بھی موت آ سکتی ہے۔) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6124]