سیدنا سعید بن مسیب رضی اللہ عنہ فرماتے ہیں: حارث بن برصاء بازار سے آئے، اور سیدنا سعد بن ابی وقاص رضی اللہ عنہ سے کہنے لگے: اے ابواسحاق! میں نے سنا ہے، مروان کہتا ہے: اللہ کا مال اس کا مال ہے، وہ جس کو چاہے دے سکتا ہے، اور جس سے چاہے روک سکتا ہے، سیدنا سعد رضی اللہ عنہ نے پوچھا: کیا تم نے خود اس کو یہ کہتے ہوئے سنا ہے؟ اس نے کہا: جی ہاں۔ سیدنا سعید بن مسیب رضی اللہ عنہ فرماتے ہیں: سیدنا سعد نے میرا اور حارث کا ہاتھ پکڑا اور مروان کے پاس چلے گئے، اس کے پاس جا کر فرمایا: اے مروان! کیا تم یہ سمجھتے ہو کہ اللہ کا مال، تیرا مال ہے؟ اور تو جسے چاہے دے دے اور جس سے چاہے روک لے؟ اس نے کہا: جی ہاں، میں نے یہ کہا ہے۔ سیدنا سعد نے ہاتھ اٹھا کر کہا: کیا میں تیرے لئے بددعا کروں؟ تو مروان اچھل کر آپ کی جانب بڑھا اور کہنے لگا: میں آپ کو اللہ کا واسطہ دیتا ہوں، آپ میرے لئے بددعا نہ کریں۔ وہ مال اللہ کا ہے، وہ جس کو چاہے عطا کرے اور جس سے چاہے روک لے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6244]

ام المومنین سیدہ عائشہ رضی اللہ عنہا فرماتی ہیں کہ ایک رات رسول اللہ صلی اللہ علیہ وسلم کو نیند نہیں آ رہی تھی، آپ نے فرمایا: کاش کہ اس رات میرے صحابہ میں سے کوئی چوکیداری کرے، ام المومنین فرماتی ہیں: ہم نے ہتھیاروں کی آوازیں سنیں، رسول اللہ صلی اللہ علیہ وسلم نے کہا: یہ کون ہے؟ تو آگے سے جواب آیا: یا رسول اللہ صلی اللہ علیہ وسلم ! میں سعد ابن ابی وقاص ہوں۔ میں آپ کی پہرے داری کرنے کے لئے آیا ہوں، ام المومنین سیدہ عائشہ رضی اللہ عنہا فرماتی ہیں: (سعد بن ابی وقاص رضی اللہ عنہ کے آ جانے کے بعد) رسول اللہ صلی اللہ علیہ وسلم اتنی سکون کی نیند سوئے کہ میں نے آپ صلی اللہ علیہ وسلم کے خراٹوں کی آواز سنی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6245]