ولید بن ہشام قحذمی اپنے والد سے، وہ ان کے دادا سے اور ابوالیقظان اور دیگر راوی روایت کرتے ہیں کہ ابن زیاد شام میں آیا، جب اہل شام سیدنا عبداللہ بن زبیر رضی اللہ عنہ کی بیعت کر چکے تھے، صرف اہل جابیہ نے ان کی بیعت نہیں کی تھی۔ ان لوگوں نے ابن زیاد کی بیعت کی۔ وہاں پر بنو امیہ اور ان کے موالی کی جانب سے مروان بن حکم موجود تھا۔ (جابیہ کے لوگوں نے مروان کی بیعت کی اور) اس کے بعد خالد بن یزید بن معاویہ کی۔ یہ واقعہ 64 ہجری، ذی القعدہ کے درمیان پیش آیا۔ پھر ان لوگوں نے ضحاک بن قیس کی جانب پیش قدمی کی۔ اور مرج راہط میں دونوں لشکروں کی مڈبھیڑ ہو گئی۔ بیس دن تک ان کے درمیان سخت جنگ ہوتی رہی، اس کے بعد ضحاک بن قیس اور اس کے ساتھیوں کو شکست ہوئی۔ یہ واقعہ 64 ہجری ذی الحجہ میں پیش آیا۔ اس جنگ میں ضحاک بن قیس رضی اللہ عنہ اور ان کے بہت سارے ساتھی شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6360]

محمد بن عمر فرماتے ہیں: سیدنا ضحاک بن قیس اکبر رضی اللہ عنہ کی کنیت ” ابوانیس “ تھی۔ رسول اللہ صلی اللہ علیہ وسلم کی وفات کے وقت سیدنا قیس ابھی نابالغ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6361]

واقدی کہتے ہیں: ضحاک بن قیس نے رسول اللہ صلی اللہ علیہ وسلم سے سماع نہیں کیا۔ (امام حاکم کہتے ہیں) ہم اللہ تعالیٰ کی توفیق سے کہتے ہیں کہ اس سلسلے میں ابوجعفر محمد بن جریر رحمۃ اللہ علیہ کا قول درست ہے۔ انہوں نے متعدد صحیح روایات نقل کی ہیں جن میں ان کے رسول اللہ صلی اللہ علیہ وسلم سے سماع کا ذکر کیا گیا ہے۔ (ان میں سے ایک حدیث درج ذیل ہے) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6362]