ابن ابی ملیکہ فرماتے ہیں: سیدنا عمر بن خطاب رضی اللہ عنہ نے یہ آیات پڑھیں: ” کیا کوئی شخص اس بات کو پسند کرتا ہے کہ اس کا کھجوروں اور انگوروں کا باغ ہو جس کے نیچے بہتی ہوں اس میں اس شخص کے (مختلف قسم کے) پھل ہوں۔“ یہ آیت یہاں تک ہے: فَأَصَابَهَا إِعْصَارٌ فِيهِ نَارٌ فَاحْتَرَقَتْ پھر لوگوں سے ان آیات کے بارے میں پوچھا:” ایود احدکم “ والی آیت کا شان نزول کیا ہے؟ لوگوں نے کہا: اللہ اور اس کا رسول بہتر جانتے ہیں۔ یہ سن کر سیدنا عمر بن خطاب رضی اللہ عنہ کو غصہ آ گیا اور فرمانے لگے: (مجھے سیدھا جواب دو کہ) تمہیں پتا ہے یا نہیں؟ سیدنا عبداللہ بن عباس رضی اللہ عنہما نے کہا: یا امیرالمومنین! میرے دل میں ایک بات ہے، سیدنا عمر رضی اللہ عنہ نے فرمایا: اے میرے بھتیجے! اپنے آپ کو چھوٹا مت سمجھو، تم جو کہنا چاہتے ہو، کہو۔ سیدنا عبداللہ بن عباس رضی اللہ عنہما نے کہا: یہ عمل کی مثال بیان کی گئی ہے۔ سیدنا عمر رضی اللہ عنہ نے فرمایا: یہ ایک مالدار شخص کی مثال ہے جو نیک اعمال کرتا ہے، پھر اللہ تعالیٰ اس پر ایک شیطان مسلط کر دیتا ہے جو اس سے گناہ کرواتا ہے، حتیٰ کہ اس کے تمام اعمال گناہوں میں ڈبو دیتا ہے، اس شخص کا باغ تھا، لیکن جب اس کی اولاد بڑھی، وہ خود بوڑھا ہو گیا، مسائل میں اضافہ ہوا، جب اس کو اس باغ کی زیادہ ضرورت پڑی، اس وقت وہ جل کر خاکستر ہو گیا۔ کیا تم میں سے کوئی شخص یہ پسند کرتا ہے کہ قیامت کے دن وہ شخص اپنے اعمال کا اجر پورا وصول کرنا چاہتا ہو، اور اس کو پورا عمل نہ دیا جائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6440]