سیدنا عبداللہ بن عمر رضی اللہ عنہما سے روایت ہے کہ صلح حدیبیہ کے دن میں نے دو مرتبہ نبی کریم صلی اللہ علیہ وسلم سے موت پر بیعت کی، وہ بیان کرتے ہیں: سیدنا عمر رضی اللہ عنہ نے لوگوں کو (ایک جگہ) جمع دیکھا تو مجھ سے فرمایا: ”جاؤ دیکھو کیا معاملہ ہے،“ میں نے دیکھا کہ نبی کریم صلی اللہ علیہ وسلم لوگوں سے موت پر بیعت لے رہے ہیں تو میں نے بھی بیعت کر لی، پھر میں نے واپس آکر سیدنا عمر رضی اللہ عنہ کو خبر دی تو وہ تشریف لائے اور بیعت کی، پھر میں نے ان کے بیعت کرنے کے بعد دوبارہ بیعت کی۔
یہ سیدنا ابن عمر رضی اللہ عنہما کے عظیم فضائل میں سے ہے اور اسے شیخین نے روایت نہیں کیا، جبکہ (راوی) عبداللہ بن عمر العمری کا ذکر صرف ان کے حافظے کی کمزوری کی وجہ سے کیا جاتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6507]

سیدنا جابر بن عبداللہ رضی اللہ عنہما سے روایت ہے کہ ہم میں سے جس نے بھی دنیا کے اس دور کو پایا، دنیا اس کی طرف مائل ہوگئی یا وہ دنیا کی طرف مائل ہوگیا، سوائے عبداللہ بن عمر رضی اللہ عنہما کے (کہ وہ دنیا کی چکا چوند سے بے نیاز رہے)۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6508]

نافع سے روایت ہے کہ سیدنا ابن عمر رضی اللہ عنہما کعبہ میں داخل ہوئے تو میں نے انہیں سجدے کی حالت میں یہ التجا کرتے سنا: ”(اے اللہ!) تو خوب جانتا ہے کہ اس دنیا کے حصول کے لیے قریش سے مقابلہ کرنے سے مجھے تیرے خوف کے علاوہ کسی چیز نے نہیں روکا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6509]