سیدنا عبداللہ بن عمر رضی اللہ عنہما فرماتے ہیں: ایک آدمی نے ان سے کوئی مسئلہ پوچھا تو انہوں نے کہا: مجھے اس کا علم نہیں ہے۔ جب وہ آدمی لوٹ کر واپس گیا تو سیدنا عبداللہ بن عمر رضی اللہ عنہما نے کہا: ابن عمر نے کتنی اچھی بات کہی ہے، اس سے وہ بات پوچھی گئی، جس کا اس کو علم نہیں تھا، تو اس نے آگے سے کہہ دیا ” مجھے اس کا علم نہیں ہے “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6518]

محمد بن عمر نے ان کا نسب یوں بیان کیا ہے ” رافع بن خدیج بن عدی بن زید بن جشم بن حارثہ بن حارث بن خزرج بن عمرو “ یہ نبیت بن مالک بن اوس ہیں۔ سیدنا رافع غزوہ احد، خندق اور تمام غزوات میں رسول اللہ صلی اللہ علیہ وسلم کے ہمراہ شریک ہوئے، جنگ احد میں سیدنا رافع بن خدیج رضی اللہ عنہ کی ہنسلی میں ایک تیر لگا۔ رسول اللہ صلی اللہ علیہ وسلم نے ان سے کہا: اگر تم چاہو تو میں یہ تیر نکال دیتا ہوں، اور اگر تم چاہو تو اس کو اسی طرح چھوڑ دو اور میں قیامت کے دن تیرے بارے میں یہ گواہی دوں گا کہ یہ شہید ہے۔ تو رسول اللہ صلی اللہ علیہ وسلم کے اس ارشاد کی بناء پر انہوں نے اس کو اسی طرح چھوڑ دیا۔ ساری زندگی انہوں نے اس کو نہیں نکالا، جب آپ ہنستے تو وہ ظاہر ہو جاتا۔ سیدنا عثمان غنی رضی اللہ عنہ کے دور خلافت میں وہ ٹوٹ گیا۔ زخم تازہ ہو گیا اور اسی کی وجہ سے ان کا انتقال ہو گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6519]

بشیر بن یسار فرماتے ہیں: سیدنا رافع بن خدیج رضی اللہ عنہ سن 74 ہجری کے اوائل میں فوت ہوئے، وفات کے وقت ان کی عمر 86 برس تھی، سیدنا عبداللہ بن عمر رضی اللہ عنہما ان کے جنازہ میں شریک ہوئے تھے۔ سیدنا رافع رضی اللہ عنہ کی کنیت ” ابوعبداللہ “ تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6520]

ابراہیم بن منذر فرماتے ہیں: سیدنا رافع بن خدیج حارثی رضی اللہ عنہ 74 ہجری میں مدینہ منورہ میں فوت ہوئے، ان کی کنیت ” ابوعبداللہ “ تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6521]

یوسف بن ماہک فرماتے ہیں: میں نے سیدنا عبداللہ بن عمر رضی اللہ عنہما کو سیدنا رافع بن خدیج رضی اللہ عنہ کی چارپائی کے دو پایوں کے درمیان کھڑے دیکھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6522]