خلیفہ بن خیاط سے روایت ہے کہ: بنو ہاشم کے حلفاء میں سے (جو بدری نہیں تھے) شداد بن ہاد تھے —اور ہاد کا نام اسامہ تھا— بن عمرو بن عبداللہ بن جابر بن بشر بن عتوارہ بن عامر بن مالک بن لیث بن بکر بن عبدمناف بن علی بن کنانہ، یہ شداد بن ہاد کے والد تھے، اور شداد رسول اللہ صلی اللہ علیہ وسلم کے ہم زلف (سلف) تھے، ان کے نکاح میں سلمیٰ بنت عمیس رضی اللہ عنہا تھیں، جو سیدنا حمزہ بن عبدالمطلب رضی اللہ عنہ (کی شہادت) کے بعد ان کے نکاح میں آئی تھیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6670]

سیدنا شداد بن ہاد رضی اللہ عنہ سے روایت ہے کہ ایک اعرابی رسول اللہ صلی اللہ علیہ وسلم پر ایمان لایا اور آپ کی اتباع کی، اور کہا: میں آپ کے ساتھ ہجرت کروں گا، تو نبی کریم صلی اللہ علیہ وسلم نے اپنے صحابہ کو اس کے متعلق (خیال رکھنے کی) وصیت فرمائی، جب غزوہ خیبر —یا حنین— کا موقع آیا تو رسول اللہ صلی اللہ علیہ وسلم کو کچھ مالِ غنیمت حاصل ہوا، آپ صلی اللہ علیہ وسلم نے اسے تقسیم فرمایا اور اس شخص کا حصہ بھی نکالا، اور وہ حصہ ان صحابہ کو دے دیا جنہوں نے اسے تقسیم کیا تھا، وہ شخص اس وقت ان کی سواریوں کی چرائی کر رہا تھا، جب وہ واپس آیا تو انہوں نے وہ حصہ اسے دے دیا، اس نے پوچھا: یہ کیا ہے؟ انہوں نے کہا: یہ وہ حصہ ہے جو نبی کریم صلی اللہ علیہ وسلم نے تمہارے لیے نکالا ہے، پس وہ اسے لے کر آپ صلی اللہ علیہ وسلم کی خدمت میں حاضر ہوا اور عرض کی: اے محمد ( صلی اللہ علیہ وسلم )! یہ کیا ہے؟ آپ صلی اللہ علیہ وسلم نے فرمایا: «قَسْمٌ قَسَمْتُهُ لَكَ» ”یہ تمہارا وہ حصہ ہے جو میں نے تمہارے لیے نکالا ہے“، اس نے عرض کی: میں نے اس (مال) کے لیے آپ کی اتباع نہیں کی تھی، بلکہ میں نے تو اس لیے آپ کی اتباع کی تھی کہ مجھے یہاں —اور اپنے حلق کی طرف اشارہ کیا— تیر لگے اور میں مر جاؤں اور جنت میں داخل ہو جاؤں، آپ صلی اللہ علیہ وسلم نے ارشاد فرمایا: ”اگر تم اللہ سے سچے رہو گے تو وہ بھی تم سے سچ فرمائے گا (تمہاری تمنا پوری کر دے گا)“، پھر وہ تھوڑی دیر ٹھہرے رہے، پھر وہ دشمن سے قتال کے لیے کھڑے ہوئے، تو اسے اٹھا کر لایا گیا جبکہ اسے وہیں تیر لگا تھا جہاں اس نے اشارہ کیا تھا، رسول اللہ صلی اللہ علیہ وسلم نے دریافت فرمایا: «أَهُوَ هُوَ؟» ”کیا یہ وہی شخص ہے؟“ لوگوں نے عرض کی: جی ہاں، آپ صلی اللہ علیہ وسلم نے فرمایا: ”اس نے اللہ سے سچ کہا تو اللہ نے اس سے سچ کر دکھایا“، پھر نبی کریم صلی اللہ علیہ وسلم نے اسے کفن دیا، اسے آگے رکھا اور اس پر نمازِ جنازہ پڑھی، آپ صلی اللہ علیہ وسلم کی اس پر پڑھی گئی نماز میں سے جو کلمات ظاہر ہوئے وہ یہ تھے: «اللَّهُمَّ هَذَا عَبْدُكَ خَرَجَ مُهَاجِرًا فِي سَبِيلِكَ، فَقُتِلَ شَهِيدًا، فَأَنَا عَلَيْهِ شَهِيدٌ» ”اے اللہ! یہ تیرا بندہ ہے جو تیری راہ میں ہجرت کر کے نکلا اور شہید ہو کر قتل ہوا، اور میں اس پر گواہ ہوں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6671]