سیدنا شداد بن الہاد رضی اللہ عنہ فرماتے ہیں: ایک دیہاتی شخص رسول اللہ صلی اللہ علیہ وسلم پر ایمان لایا اور آپ صلی اللہ علیہ وسلم کے ہمراہ ہجرت کی خواہش کا بھی اظہار کیا۔ نبی اکرم صلی اللہ علیہ وسلم نے صحابہ کرام کے ذمے لگا دیا، جب غزوہ خیبر یا حنین کا موقع آیا، رسول اللہ صلی اللہ علیہ وسلم نے صحابہ کرام میں غنیمتیں تقسیم فرمائیں، آپ صلی اللہ علیہ وسلم نے سیدنا شداد کے لئے ان کے ساتھیوں کو حصہ دیا۔ آپ ان لوگوں کی بکریاں چرایا کرتے تھے، جب وہ آئے تو ان کے ساتھیوں نے ان کا حصہ ان کے سپرد کیا، انہوں نے پوچھا: یہ کیا ہے؟ انہوں نے بتایا کہ رسول اللہ صلی اللہ علیہ وسلم نے یہ تمہارے لئے بھیجا ہے، سیدنا شداد رضی اللہ عنہ نے وہ حصہ وصول کیا اور رسول اللہ صلی اللہ علیہ وسلم کی بارگاہ میں چلے آئے، آ کر عرض کی: یا رسول اللہ صلی اللہ علیہ وسلم میں نے اس غرض سے تو آپ کی بیعت نہیں کی، پھر وہ (اپنے حلق کی جانب اشارہ کرتے ہوئے) کہنے لگے: لیکن میں نے تو اس لئے بیعت کی تھی تاکہ میرے اس حلق پر تیر لگتا، میں شہید ہوتا اور جنت میں داخل ہوتا۔ رسول اللہ صلی اللہ علیہ وسلم نے فرمایا: اگر تم اللہ تعالیٰ کی بات کو پورا کرو گے تو اللہ تعالیٰ تمہاری بات پوری کرے گا۔ اس کے بعد کوئی زیادہ دیر نہیں گزری تھی کہ وہ دشمن کی فوج میں جا گھسے، لڑائی کے بعد جب ان کو رسول اللہ صلی اللہ علیہ وسلم کی بارگاہ میں پیش کیا گیا تو ان کے حلق کے اسی مقام پر تیر پیوست تھا جہاں پر انہوں نے اشارہ کیا تھا، نبی اکرم صلی اللہ علیہ وسلم نے دریافت کیا: کیا یہ وہی شخص ہے؟ صحابہ کرام نے بتایا کہ جی ہاں یہ وہی شخص ہے۔ آپ صلی اللہ علیہ وسلم نے فرمایا: اس نے اللہ تعالیٰ کا وعدہ سچ کر دیا اور اللہ تعالیٰ نے اس کا وعدہ سچ کر دیا۔ نبی اکرم صلی اللہ علیہ وسلم نے خود ان کو کفن دیا اور ان کی نماز جنازہ پڑھائی۔ رسول اللہ صلی اللہ علیہ وسلم نے ان کے لئے یہ دعا مانگی ” اے اللہ! تیرا یہ بندہ تیری راہ میں جہاد کرنے کے لئے نکلا تھا، یہ تیری راہ میں شہید ہو گیا ہے اور میں اس کا گواہ ہوں۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 6671]