خلیفہ بن خیاط سے مروی ہے کہ: اسود بن سریع بن حمیر بن عبادہ بن نزال بن مرہ بن عبید، ان کا بصرہ میں جامع مسجد کے پاس بنو تمیم والی سمت میں ایک گھر تھا اور ان کی وفات سیدنا معاویہ رضی اللہ عنہ کے دورِ خلافت میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6719]

سیدنا اسود بن سریع رضی اللہ عنہ سے روایت ہے، انہوں نے عرض کی: یا رسول اللہ! کیا میں آپ کو وہ تعریفی کلمات نہ سناؤں جن کے ذریعے میں نے اپنے رب عزوجل کی حمد بیان کی ہے؟ آپ صلی اللہ علیہ وسلم نے ارشاد فرمایا: ”بے شک تمہارا رب عزوجل حمد کو پسند فرماتا ہے“، اور آپ صلی اللہ علیہ وسلم نے اس پر مزید کچھ نہیں کہا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6720]

سیدنا اسود بن سریع تمیمی رضی اللہ عنہ سے روایت ہے، انہوں نے کہا: میں نبی اللہ صلی اللہ علیہ وسلم کی خدمت میں حاضر ہوا اور عرض کی: اے اللہ کے نبی! میں نے کچھ اشعار کہے ہیں جن میں اللہ عزوجل کی ثنا بیان کی ہے اور آپ کی مدح کی ہے، آپ صلی اللہ علیہ وسلم نے فرمایا: ”جو تم نے اللہ کی ثنا بیان کی ہے وہ سناؤ، اور جو میری مدح کی ہے اسے رہنے دو“، چنانچہ میں سنانے لگا، اتنے میں ایک دراز قد اور نمایاں ناک والے شخص داخل ہوئے تو آپ صلی اللہ علیہ وسلم نے مجھ سے فرمایا: ”رک جاؤ“، جب وہ چلے گئے تو آپ صلی اللہ علیہ وسلم نے فرمایا: ”سناؤ“، میں پھر سنانے لگا، ابھی تھوڑی دیر ہی گزری تھی کہ وہ دوبارہ آ گئے تو آپ صلی اللہ علیہ وسلم نے پھر فرمایا: ”رک جاؤ“، جب وہ (دوبارہ) چلے گئے تو آپ صلی اللہ علیہ وسلم نے فرمایا: ”سناؤ“، میں نے عرض کی: اے اللہ کے نبی! یہ کون شخص ہیں جن کے آنے پر آپ فرماتے ہیں ”رک جاؤ“ اور چلے جانے پر فرماتے ہیں ”سناؤ“؟ آپ صلی اللہ علیہ وسلم نے ارشاد فرمایا: ”یہ عمر بن خطاب ہیں، اور باطل (لہو و لعب) سے ان کا کوئی تعلق نہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6721]